Япониянинг энг йирик уюшган жиноятчилик гуруҳи – “Ямагучи-гуми” полицияга мурожаат қилиб, рақиб тўда билан кўп йиллик урушни тугатишини ва “бошқа муаммо келтирмаслик” мажбуриятини олганини маълум қилди. Бу ҳақда CNN хабар бермоқда.
Душанба куни “Ямагучи-гуми”нинг уч нафар юқори мартабали аъзоси Ҳёго префектураси полиция бошқармасига келиб, “ички тўқнашувларни тугатиш ва тинчликни сақлаш” мазмунидаги расмий хатни топширган.
“Ямагучи-гуми” дунёдаги энг бой ва энг катта жиноий синдикатлардан бири бўлиб, 2015 йилдан бери ўзидан ажралиб чиққан “Кобе Ямагучи-гуми” билан очиқ зиддиятда эди. Бу икки гуруҳ ўртасидаги рақобат ўнлаб отишма ва пичоқбозликларга сабаб бўлган.
“Тўқнашувлар жиддий ва олдиндан айтиб бўлмас ҳолатга келган”, деган эди Япония Миллий полиция агентлиги 2021 йилда.
Бу икки жиноий гуруҳ ўртасидаги тўқнашувлар асосан жамоат жойларида рўй бергани сабабли полиция хавфсизлик чораларини кучайтиришга мажбур бўлган.
Якуза: қонуний эмас, лекин тақиқланмаган ҳам
Японияда “якуза” атамаси уюшган жиноятчилик гуруҳлари учун умумий ном бўлиб, улар тўғридан тўғри тақиқланмаган, бироқ расмий равишда назорат остида ва чекловлар билан фаолият юритади. Қолаверса, улар ўзига хос анъаналар ва “ёзилмаган қоидалар”га эга.
2020 йилдан бошлаб “Ямагучи-гуми” ва “Кобе Ямагучи-гуми” “уруш ҳолатидаги гуруҳлар” сифатида тан олинган. Бу полицияга:
- уларнинг фаолиятини чеклаш,
- офисларидан фойдаланишни тақиқлаш,
- молиявий оқимларини назорат қилиш каби ваколатларни берган.
Якуза таназзулда, янги хавф — токурю
Расмий маълумотларга кўра, 2024 йилда якуза аъзолари сони 18 800 нафарни ташкил этган. Бу сўнгги ўн йилликлардаги энг паст кўрсаткич ҳисобланади. Хусусан, “Ямагучи-гуми” аъзолари 2014 йилдаги 6 000 нафардан, 2024 йил охирига келиб 3 300 нафарга қисқарган. “Кобе Ямагучи-гуми”да эса атиги 120 нафар аъзо қолган.
Якуза таназзулга учраркан, Япония ҳукумати олдида янги хавф пайдо бўлди. У токурю бўлиб, ҳеч бир мафияга алоқадор бўлмаган, кичик ва мустақил жиноий гуруҳлар ҳисобланади.
Биргина ўтган йилнинг ўзида токурю гуруҳларига алоқадор 10 минг киши терговга тортилган.
Изоҳ (0)