AQSH prezidenti Adliya vazirligiga ikki sobiq rasmiy — Mayls Teylor va Kris Krebsga qarshi tergov o‘tkazishni buyurdi. Ular Donald Trampning birinchi prezidentlik muddatida u bilan birga ishlagan, ammo keyinchalik ochiq tanqid qilgandi. Bu haqda The Guardian xabar berdi.
Tramp kecha, 9-aprel kuni imzolagan maxsus memorandumga ko‘ra, tergov jarayonlari davlat sirlarini oshkor qilish va prezidentga qarshi “xoinona” harakatlar bilan bog‘liq ayblovlar asosida olib borilishi mumkin.
Mayls Teylor Ichki xavfsizlik departamentining sobiq shtab boshlig‘i bo‘lib, 2018-yili New York Times gazetasida “Men Tramp ma’muriyatidagi qarshilik harakatining bir qismiman” sarlavhasi bilan anonim maqola chop etgan edi. U keyinchalik o‘z shaxsini oshkor qilib, “A Warning” (“Ogohlantirish”) nomli kitob chop qildi.
O‘z navbatida, Tramp Teylorni Oq uydagi chiqishida “josusga o‘xshagan xoin” deb atadi.
“Men aytaman, bu Mayls Teylor degani kim o‘zi? U anonim tarzda kitob yozdi, yolg‘onlar tarqatdi. Bu xoinlik, josuslik bilan teng”, dedi prezident.
Teylor AQSH prezidentining bu so‘zlariga X ijtimoiy tarmog‘i orqali javob qaytarib, bu holat Tramp “siyosiy repressiyalarga moyilligini yana bir bor isbotlashi” haqida yozdi:
“Men bu sodir bo‘lishini aytgandim. Muxolif fikr bildirish jinoyat emas. Bu, albatta, xoinlik ham emas. Amerika qorong‘i yo‘lga kirib bormoqda. ”
Nishonga olingan ikkinchi shaxs Kris Krebs bo‘lib, u Qo‘shma Shtatlarning Kiberxavfsizlik va infratuzilma xavfsizligi agentligi (CISA) rahbari sifatida ishlagan.
Tramp Krebsni “saylovni soxtalashtirishda ko‘maklashish” va “so‘z erkinligini bostirish” kabilarda ayblab, unga qarshi jiddiy choralar ko‘rilishini bildirdi.
“Bu odam saylov eng xavfsiz bo‘lganini aytdi. Yo‘q, bu saylov falokat edi. Agar bu yolg‘on bo‘lsa, u albatta javob beradi”, dedi u.
Bu orqali Tramp Krebsning 2020-yilgi prezidentlik saylovlari haqida aytganlarini eslatdi. O‘shanda u Donald Trampning mag‘lubiyatidan mamnunligini yashirmay, “bu eng xavfsiz saylov bo‘ldi” degandi.
Izoh (0)