Apple kompaniyasi AQSH prezidenti joriy etgan yangi bojxona tariflaridan qochish uchun Hindistonda ishlab chiqarilgan 600 tonnaga yaqin iPhone smartfonlarini yuk samolyotlari orqali Qo‘shma Shtatlarga jo‘natdi. Xabar berilishicha, bu juda shoshilinch amalga oshirilgan.
Manbalarga ko‘ra, Apple o‘zining eng yirik bozorlaridan biri hisoblangan AQSHda mahsulotlar zaxirasini oshirish uchun bu strategiyani tanlagan. Kompaniyaning asosiy ishlab chiqarish bazasi Xitoyda joylashgan, biroq Apple 145 foizlik boj to‘lovlaridan qochishga harakat qilmoqda. Shu bilan birga, Hindistondan olib kelinadigan mahsulotlarga belgilangan 26 foizlik boj ham kompaniya rahbariyatini qoniqtirmayapti.
Xabar qilinishicha, Apple buning uchun mart oyidan buyon har biri 100 tonna sig‘imga ega oltita yuk samolyotini jalb qilgan. Ulardan biri esa bu hafta, yangi boj tariflari kuchga kirishidan oldin AQSHga uchib ketgan.
Kompaniya rahbariyati Hindistondagi Tamil Nadu shtatida joylashgan Chennay aeroportida maxsus tezlashtirilgan “yashil koridor” tashkil etishni so‘ragan. Bu orqali mahsulotlarni bojxona rasmiylashtiruvidan o‘tkazish muddati 30 soatdan 6 soatgacha qisqartirilgan. Mazkur tizim Apple’ning Xitoydagi ayrim aeroportlarda qo‘llaydigan modeliga o‘xshaydi.
Reuters hisob-kitoblariga ko‘ra, qadoqlangan iPhone 14 va uning zaryadlovchi qurilmasi o‘rtacha 350 grammni tashkil qiladi. Shundan kelib chiqsa, 600 tonnalik yuk taxminan 1,5 million dona iPhone’ga to‘g‘ri keladi.
Apple har yili dunyo bo‘ylab 220 milliondan ortiq iPhone sotadi. Counterpoint Research tahlillariga ko‘ra, hozirda AQSHda sotilayotgan iPhone’larning 20 foizi Hindistondan, qolganlari esa asosan Xitoydan import qilinadi.
Tramp boshchiligidagi ma’muriyat Xitoydan keltiriladigan mahsulotlarga boj tariflarini ketma-ket oshirib bormoqda. Buning natijasida iPhone narxlari uch barobargacha qimmatlashi mumkinligi aytilmoqda.
Izoh (0)