Turk shou-biznesi yangiliklari: mish-mishlarga nuqta qo‘ygan Hande Erchel, avtohalokatga uchragan aktyor, Burak O‘zchivit oilasida bayram

Mazkur turk shou-biznesi yulduzlarini turli film va seriallar orqali yaxshi taniysiz, lekin ularning kadr ortidagi hayoti haqida ko‘pchilikka ma’lum emas.

Murat Yunalmish va oilasi tabiat qo‘ynida

Tomoshabinlarga “Guljamol” seriali orqali tanish aktyor Murat Yunalmish rafiqasi Nutiya Akar va o‘g‘li bilan qor yog‘ishini tomosha qilib tushgan suratlarini ijtimoiy tarmoqdagi sahifasiga joyladi.

“Samoviy muhabbat”, “Telba yurak”, “Chukurovda bir kun” kabi muvaffaqiyatli spektakllarda ishtirok etgan Murat Yunalmish o‘tgan yilning aprel oyida o‘g‘il farzandli bo‘ldi va unga Selim Baran deb ism qo‘ydi.

Tolga Saritash avtohalokatga uchradi

Turkiyaning mashhur “Razvedka” serialida bosh rollardan birini ijro etayotgan taniqli aktyor Tolga Saritash avtohalokatga uchradi. Muhabir Online tarqatgan xabarga ko‘ra, voqea aktyorning mashinasi ortidan boshqa bir transport vositasi kelib urilishi oqibatida sodir bo‘lgan. Yetkazilgan moddiy zararga qaramay, Tolga Saritashning o‘zi jabrlanmagan va uning sog‘lig‘i yaxshi deb baholanmoqda.

Hozircha aktyor baxtsiz hodisa yuzasidan rasmiy bayonot bermadi. Muxlislar uni qo‘llab-quvvatlab, sevimli aktyori bilan hammasi joyida ekanligidan xursand.

Mine Demirtash 17 yoshda: butun suratga olish guruhi aktrisani tabrikladi

“Qizil g‘unchalar” serialidagi Zeynep obrazi bilan tanilgan iste’dodli yosh aktrisa Mine Demirtash 17 yoshni qarshi oldi. Bu o‘ziga xos kunni suratga olish maydonchasidagi hamkasblari e’tibordan chetda qoldirishmadi, ular yosh yulduzni tabriklashdi.

Minening hamkasblaridan biri Mert Yazijio‘g‘li ijtimoiy tarmoqlardagi sahifasida tug‘ilgan kun egasining suratini joylashtirdi va “Tug‘ilgan kuning bilan!” deb tabrik yozdi. Suratga olish guruhining boshqa a’zolari ham bayramga qo‘shilib, Mine uchun suratga olish maydonchasida tort va iliq tilaklar bilan kichik bayram uyushtirishdi.

Gulsim Ali 30 yoshni qarshiladi

“Qalb tog‘i” serialida Dilek rolini ijro etgan Gulsim Ali 30 yoshini Kurucheshmada o‘tkazilgan tadbirda nishonladi.

“Men 30 yoshga to‘ldim. Bu yosh menga shunchalik ko‘p go‘zallik olib keldiki, men har doim orzu qilgan narsalarga erishdim”.

Gulsim Ali yangi yoshida muhabbat izlayotgani haqida gapirar ekan, qo‘shimcha qildi: 

“Hatto onam ham: Endi bizni xursand qil, qizim, deyapti. Mening sevgilim kelishgan va qalbi go‘zal bo‘lsa kifoya”.

Hande Erchel va Hakan Sabanjining ajralishi haqidagi mish-mishlarga fotojavob

Turkiya shou-biznesining eng ko‘p muhokama qilinadigan juftliklaridan biri Hande Erchel va Hakan Sabanji ajralishlari haqidagi mish-mishlarga barham berishga qaror qilishdi va birgalikda ta’tilga chiqishdi. Yaqinda ommaviy chiqishlar qilmagani uchun e’tibor markazida bo‘lgan juftlik Ispaniya poytaxti Madridda tushgan suratlarini e’lon qildi va ularning munosabatlari hali ham mustahkam ekanini tasdiqladi.

Juftlik birga vaqt o‘tkazishga va Ispaniyada dam olishdan zavqlanishga qaror qildi. Hande Erchel Instagram’dagi sahifasida hozirda Ispaniya klubida to‘p surayotgan turkiyalik futbolchi Arda Guler ishtirokidagi futbol uchrashuviga tashrif buyurganidan lavhalar bilan bo‘lishdi.

Keremning tug‘ilgan kunini butun oila nishonladi

Fahriye Evjen va Burak O‘zchivit ikkinchi o‘g‘li Keremning tug‘ilgan kunini nishonlab, ijtimoiy tarmoqlardagi sahifalariga post joylashdi.

2017-yilda turmush qurgan Fahriye Evjen va Burak O‘zchivit, 2019-yilda Karan ismli o‘g‘il ko‘rib, ilk marta ota-ona bo‘lishgandi. 2023-yil 18-yanvarda esa ikkinchi bor farzandli bo‘lish baxtiga erishdilar.

Aktyorlar juftligi ikki yoshga to‘lgan o‘g‘illari Keremning tug‘ilgan kunini dinozavrlar mavzusidagi ziyofat bilan nishonlashdi. Tug‘ilgan kun ziyofatidan so‘ng, Fahriye Evjen ijtimoiy tarmoqlardagi sahifasida bayram suratlarini e’lon qildi.

Aktrisa o‘z postiga quyidagi tabrikni qo‘shdi: “Keremim, gul isli o‘g‘lim, jonim... Seni juda qattiq yaxshi ko‘raman”.