Samarqand viloyatida “Xalq ijodiyoti karvoni” loyihasi bo‘lib o‘tmoqda

Joriy yilning 5-noyabridan boshlab Samarqand viloyatida “Xalq ijodiyoti karvoni” ijodiy loyihasi o‘z ishini boshladi.

Mazkur loyihada Qoraqalpog‘iston Respublikasi, viloyatlar va Toshkent shahridan 14 ta havaskorlik jamoasi ishtirok etmoqda. Ularning orasida Xalq havaskorlik unvoniga ega bo‘lgan 6 ta folklor-etnografik jamoa, 6 ta ashula va raqs ansambli hamda 2 ta namunaviy bolalar jamoasi bor.

Bugun biz amalga oshirayotgan har bir madaniy tadbir xalqimizning boy ma’naviy merosini kelajak avlodga yetkazishga xizmat qilishi lozim. “Xalq ijodiyoti karvoni” loyihasi aynan shu maqsadga qaratilgan bo‘lib, u orqali yoshlarimiz milliy qadriyatlarimizning noyob namunalari bilan yaqindan tanishish imkoniyatiga ega bo‘ladilar, deydi madaniyat vaziri Ozodbek Nazarbekov.

Konsert dasturlari viloyatning barcha tuman va shaharlarida o‘rtacha ming nafardan ziyod tomoshabinni o‘z bag‘riga olmoqda. Tadbirlarda har bir hududning o‘ziga xos urf-odatlari, qadriyatlari va an’analari musiqiy kompozisiyalar orqali namoyish etilmoqda.

Ma’lum qilinishicha, ushbu loyiha 5-dekabrgacha davom etadi.

Yakuniy tadbir sifatida Samarqand shahrida Folk party shou gala konserti tashkil etilishi rejalashtirilgan bo‘lib, unda barcha ishtirokchilar va taniqli san’atkorlar ishtirok etishadi.

Madaniyat vazirligi tomonidan bu kabi tadbirlarning muntazam tashkil etilishi orqali aholi, ayniqsa yoshlar orasida milliy qadriyatlarimizning eng noyob namunalarini targ‘ib etib borish maqsad qilingan.

Sheriklik huquqi asosida.