Самарқанд вилоятида “Халқ ижодиёти карвони” лойиҳаси бўлиб ўтмоқда

Жорий йилнинг 5 ноябридан бошлаб Самарқанд вилоятида “Халқ ижодиёти карвони” ижодий лойиҳаси ўз ишини бошлади.

Мазкур лойиҳада Қорақалпоғистон Республикаси, вилоятлар ва Тошкент шаҳридан 14 та ҳаваскорлик жамоаси иштирок этмоқда. Уларнинг орасида Халқ ҳаваскорлик унвонига эга бўлган 6 та фолклор-этнографик жамоа, 6 та ашула ва рақс ансамбли ҳамда 2 та намунавий болалар жамоаси бор.

Бугун биз амалга ошираётган ҳар бир маданий тадбир халқимизнинг бой маънавий меросини келажак авлодга етказишга хизмат қилиши лозим. “Халқ ижодиёти карвони” лойиҳаси айнан шу мақсадга қаратилган бўлиб, у орқали ёшларимиз миллий қадриятларимизнинг ноёб намуналари билан яқиндан танишиш имкониятига эга бўладилар, дейди маданият вазири Озодбек Назарбеков.

Концерт дастурлари вилоятнинг барча туман ва шаҳарларида ўртача минг нафардан зиёд томошабинни ўз бағрига олмоқда. Тадбирларда ҳар бир ҳудуднинг ўзига хос урф-одатлари, қадриятлари ва анъаналари мусиқий композисиялар орқали намойиш этилмоқда.

Маълум қилинишича, ушбу лойиҳа 5 декабргача давом этади.

Якуний тадбир сифатида Самарқанд шаҳрида Folk party show гала концерти ташкил этилиши режалаштирилган бўлиб, унда барча иштирокчилар ва таниқли санъаткорлар иштирок этишади.

Маданият вазирлиги томонидан бу каби тадбирларнинг мунтазам ташкил этилиши орқали аҳоли, айниқса ёшлар орасида миллий қадриятларимизнинг энг ноёб намуналарини тарғиб этиб бориш мақсад қилинган.

Шериклик ҳуқуқи асосида.