Xitoy hukumati Rossiya bozoriga sarmoya kiritish va u yerda zavodlar qurishni rejalashtirgan avtomobil ishlab chiqaruvchilari uchun yangi cheklovlar joriy etdi. Bu haqda The Moscow Times xabar berdi.
Ma’lum qilinishicha, qarorga bir qator omillar, jumladan, Rossiyadagi iqtisodiy beqarorlik, xalqaro siyosatdagi noaniqlik va sanksiyalar sharoitida biznes uchun potensial xatarlar sabab bo‘lgan. Mutaxassislar taqiq Rossiya hukumatining avtomobil sanoatini rivojlantirish va Xitoy bilan iqtisodiy aloqalarni mustahkamlash rejalariga ta’sir o‘tkazishini aytmoqda. Sohada Xitoy investitsiyalari hamda texnologiyalariga umid qilgan Rossiya yangi qiyinchiliklarga duch kelishi mumkin.
Taqiq sabablaridan biri, agar Rossiya iqtisodiyoti navbatdagi sanksiyalar yoki iqtisodiy zarbalarga duch kelsa, Xitoyning o‘z strategik manfaatlariga ta’sir qilishidan xavotirlanishi bo‘lishi mumkin. Bundan tashqari, Xitoyning beqaror xalqaro vaziyat va Rossiya iqtisodiyotidagi noaniqlik sharoitida o‘z xatarlarini kamaytirishga bo‘lgan intilishi hamdir, deyiladi xabarda.
Rossiya rasmiylari va ishbilarmonlari ham ushbu qarorning mamlakat avtomobil sanoati uchun ehtimoliy oqibatlaridan xavotirda.
Shu bilan birga, Xitoy avtokonsernlari Rossiya bozorida avtomobillar, ehtiyot qismlar va texnologiyalarni yetkazib berish kabi boshqa shakllarda faol bo‘lib qolmoqda. Biroq, yangi zavodlar va ishlab chiqarish quvvatlarining yo‘qligi sohaning rivojlanishini sekinlashtirishi va Rossiyada uzoq muddatli rejalarga ta’sir qilishi mumkin.
Ushbu vaziyat xalqaro iqtisodiy aloqalarning murakkabligi va ko‘p qirraligini, shuningdek, o‘zgarib borayotgan global sharoitda Rossiya va Xitoy yangi hamkorlik yo‘llarini izlash zarurligini yaqqol ko‘rsatib turibdi, deyiladi xabarda.
Izoh (0)