Ijtimoiy tarmoqlarda “O‘zbekistondagi zapravkalarda yana navbat boshlandi” sarlavhasi ostida Farg‘ona hamda Surxondaryo viloyatidagi ayrim metan zapravkalar (avtomobillarga gaz to‘ldirish kompressor shoxobchalari) umuman ishlamayotgani haqida xabarlar tarqalgan edi.
Mazkur holat yuzasidan “Hududgazta’minot” AJ axborot xizmati rahbari Dilorom Jumaniyozova “Daryo”ga izoh berdi. Uning aytishicha, Termiz shahri va Termiz tumanida joylashgan AGTKShga gaz yetkazib berish vaqtincha to‘xtatilishiga texnik nosozlik sabab bo‘lgan.
Nosozlik bartaraf etilib, Termiz shahri va Termiz tumanida joylashgan avtomobillarga gaz to‘ldirish kompressor shoxobchalari (AGTKSH)ni tabiiy gaz bilan ta’minlash qayta tiklandi. Ayni paytda mazkur shoxobchalarga tabiiy gaz yetkazib berish bir maromda davom etmoqda, dedi Dilorom Jumaniyozova.
Farg‘ona viloyati tumanidagi metan zapravkalarga esa Rishton GTS 3-sanoat tarmog‘iga o‘rnatilgan EGXUning davlat qiyoslov ko‘rigi tugagani sababli tarmoq soat 00:00 dan 13:00 ga qadar o‘chirilgan.
Shu jarayonda tarmoqdagi 7 ta AGTKSH vaqtincha ishlamagan. Natijada qo‘shni tumandagi (Bag‘dod tumani) 4 ta metan zapravkada tirbandliklar kuzatilgan. 13:00 dan GTS tarmog‘i yoqilgan va 7 ta metan zapravka ishga tushgan. Shundan so‘ng mazkur holat yumshagan.
Izoh (0)