Тошкент халқаро аэропортида қимматбаҳо соатни ноқонуний олиб ўтишга уриниш, таркибида кучли таъсир қилувчи модда бўлган қаҳвани олиб кириш фош этилди. Бу ҳақда “Дарё”га “Тошкент-Аэро” ихтисослаштирилган божхона комплекси ахборот хизмати хабар берди.
![](/static/2024/09/10/photo_2024-09-10_10-33-26-vCzuoimA.jpg)
Москвадан Тошкентга учиб келган ўзбекистонлик Р.Д.нинг қўл ва йўл сумкалари белгиланган тартибда текширувдан ўтказилганда унда божхона назоратига тақдим этилмаган, жисмоний шахслар томонидан товарларни божсиз олиб кириш меъёридан ортиқ бўлган, муқобил манбаларга кўра тахминий нархи 104 миллион 280 минг сўм бўлган 1 дона Rolex oyster perpetual datejust номли қўл соати борлиги аниқланди.
Ҳозирда ҳолат юзасидан суриштирув ҳаракатлари олиб борилмоқда.
Шунингдек, мазкур аэропортда таркибида кучли таъсир қилувчи модда бўлган салкам 10 минг дона “қаҳва”лар ҳам тўхтатиб қолинган.
![](/static/2024/09/10/photo_2024-09-06_12-34-03-YY6a5PNq.jpg)
Ислом Каримов номидаги Тошкент халқаро аэропорти чегара-божхона пости ходимлари томонидан Истанбул—Тошкент йўналиши бўйича учиб келган бир гуруҳ ўзбекистонликлар тегишли тартибда божхона назоратидан ўтказилди. Фуқароларнинг қўл юклари ва багажлари текширилганда, божхона назоратига белгиланган тартибда тақдим этилмаган, сифат кўрсаткичларини тасдиқловчи ҳужжатларга эга бўлмаган, ҳеч қандай рухсатномасиз жами 358 қути ичида 9 210 дона Кето форм слиммер cоффее номли биоактив моддаларга ўхшаш кукунсимон маҳсулотлар борлиги аниқланди. Ўзбекистон Республикаси ИИВ эксперт-криминалистика бош маркази томонидан судга оид кимёвий экспертиза хулосаларига кўра, мазкур маҳсулотлар таркибида “сибутрамин” ва кофеин моддалари мавжуд бўлиб, “сибутрамин” моддаси Вазирлар Маҳкамасининг 2023 йил 19 августдаги қарорида кўрсатиб ўтилган республика ҳудудида муомаласи чекланган кучли таъсир қилувчи моддалар эканлиги маълум бўлди. Ҳозирда мазкур ҳолат юзасидан божхона органлари томонидан Жиноят Кодексининг тегишли моддалари билан жиноий иш қўзғатилган, дейилади “Тошкент-Аэро” ихтисослаштирилган божхона комплекси ахборот хизмати берган хабарда.
Изоҳ (0)