Prezident boshchiligida o‘tkazilayotgan yig‘ilishda, o‘tgan yili Qoraqalpog‘istondagi sanoat loyihalari uchun 100 million dollar resurs berilgani ma’lum qilindi.
Nukus shahrida sanoat ipotekasi asosida tadbirkorlarga beriladigan 35 ming kvadrat metr maydoni bor ilk loyiha ishga tushmoqda. Bir oy ichida yana bir shunday obyekt foydalanishga topshiriladi.
Mutasaddilarga ushbu tajribani ommalashtirib, yil yakunigacha Nukus erkin iqtisodiy zonasi hududida zamonaviy texnopark tashkil qilish topshirildi. Bunda, biznes uchun tayyor binolar qurilib, tadbirkorlarga 10 yilga lizingga beradi.
Shuningdek, Qoraqalpog‘istonda sanoatni rivojlantirish uchun yana 100 million dollar yo‘naltiriladi.
Nukus shahrida 1 million dollar, qolgan tumanlarda 300 ming dollar investitsiya kiritish sharti bilan Qoraqalpog‘iston Vazirlar Kengashi qarori asosida yer uchastkalari to‘g‘ridan to‘g‘ri berilmoqda.
Kichik investitsiyalarga ham yer to‘g‘ridan to‘g‘ri berilsa, investorlar Nukus shahri, tuman markazlari va yo‘l bo‘ylarida kamida 2 ming aholini ish bilan ta’minlamoqchi.
Davlat rahbari bunday kichik va o‘rta loyihalarga yerni to‘g‘ridan to‘g‘ri ajratish taklifini ma’qulladi.
Umuman, Qoraqalpog‘istonda amalga oshirsa bo‘ladigan yana 9,5 milliard dollarlik 120 ta istiqbolli loyihalar tayyorlangan.
Sentyabr oyida Qoraqalpog‘istonda yirik Investitsiya forumini o‘tkazish reja qilingan. Mas’ullarga forumga puxta tayyorgarlik ko‘rish topshirig‘i berildi.
Izoh (0)