O‘sh viloyatida sel kelishi oqibatida halok bo‘lgan yetti yoshli qizning jasadi Andijondan topildi. Bu haqda Qirg‘iziston Favqulodda vaziyatlar vazirligiga tayanib, “24.kg” xabar berdi.
Ma’lum qilinishicha, 2017-yilda tug‘ilgan qizning jasadi Andijon shahridagi Shahrixonsoy irrigatsiya kanalidan topilgan. Jasad “Do‘stlik” chegara posti orqali Qirg‘iziston tomoniga topshirilgan. Qutqaruvchilar sel oqizib ketgan ikki ayol va yana ikki qizni qidirishda davom etmoqda.
14-iyul kuni kuchli yog‘ingarchilik natijasida O‘sh viloyati qishloqlari va O‘sh shahrida kuchli sel kuzatilgandi. Hodisa oqibatida Andijon viloyati Oqbo‘ra soyi Xo‘jaobod tumani Yorqishloqdagi ko‘prikni sel oqizib ketgan, piyodalar ko‘prigi qulab vayron bo‘lgan. Hodisa oqibatida hech kim jabrlanmagan.
Shu kuni Andijon viloyati hokimligi Shahrixonsoydan oqib ketgan qiz jonsiz holatda topilganini ma’lum qilgandi. IIB vakillari qizning shaxsiga aniqlik kiritishlari haqida ma’lumot bergan. Qirg‘iziston Favqulodda vaziyatlar vazirligi marhuma ularning fuqarosi ekanini xabar qilgan.
Izoh (0)