TBC Uzbekistan’ning 2024-yilning birinchi yarim yilligi uchun MHXS bo‘yicha moliyaviy natijalari: kredit portfeli o‘tgan yilning shu davriga nisbatan 117% ga o‘sib, 5 trillion so‘mga yetdi, 2024-yilning birinchi yarmidagi sof foyda 110 mlrd so‘mni tashkil etdi.
TBC Bank Uzbekistan mobil banki va payme raqamli to‘lovlar ilovasini o‘z ichiga olgan Markaziy Osiyodagi raqamli bank ekotizimi bo‘lgan TBC Uzbekistan bugun 2024-yil 30-iyunda yakunlangan uch oylik va olti oylik davrlar uchun MHXS bo‘yicha yig‘ma moliyaviy natijalarni e’lon qiladi. TBC Uzbekistan ekotizimi London fond birjasida savdo qilinadigan TBC Bank Group PLC ("Guruh") tarkibiga kiradi.
TBC Uzbekistan 2024-yilning ikkinchi choragi va birinchi yarim yilligi uchun kuchli natijalarni ko‘rsatdi: barcha asosiy ko‘rsatkichlar bo‘yicha sezilarli o‘sish qayd etildi.
Portfelning jadal o‘sishi: 2024-yil 30-iyun holatiga ko‘ra kredit portfeli 5 trillion so‘mgacha o‘sdi (2023-yil 30-iyun holatidagi 2,3 trillion so‘mga nisbatan o‘sish 117% ni tashkil etdi). Kompaniya O‘zbekiston bozoridagi ulushini oshirishda davom etmoqda: 2024-yil 1-iyun holatiga ko‘ra naqd pul ko‘rinishidagi kreditlar va mikroqarzlarining bozor ulushi 15,8% ni tashkil etdi (2023-yil yakunlariga ko‘ra — 13,9%). TBC Uzbekistan’ning TBC Bank Group PLC natijalariga qo‘shgan hissasi ortib bormoqda: 2024-yil 30-iyun holatiga ko‘ra, Guruh portfelidagi iste’mol kreditlari umumiy hajmining 44% TBC Uzbekistan’ga to‘g‘ri keldi.
Jismoniy shaxslar depozitlarining yuqori o‘sish sur’ati: Depozitlar hajmi 2024-yil 30-iyun holatiga ko‘ra 3,2 trillion so‘mgacha oshdi (bir yil oldingi 2 trillion so‘mga nisbatan 61% ga o‘sish), bu O‘zbekistondagi bunday omonatlar umumiy hajmining 3% ni tashkil etadi. 2024-yil 30-iyun holatiga ko‘ra TBC Bank Group jismoniy shaxslar depozitlari portfelining 8% TBC Uzbekistan’ga to‘g‘ri keldi.
Yuqori rentabellik ko‘rsatkichlari:
Umumiy operasion daromad 2024-yilning ikkinchi choragida 422 mlrd so‘mgacha (o‘sish o‘tgan yilning shu davriga nisbatan 105% ni tashkil etdi) va 2024-yilning birinchi yarmida 768 mlrd so‘mgacha oshdi (o‘sish 2023 yilning birinchi yarmiga nisbatan 106% ni tashkil etdi), shu bilan birga TBC Bank Group umumiy operatsion daromadining 13% TBC Uzbekistan’ga to‘g‘ri keldi. Sof foiz marjasi (NIM) 2024-yilning ikkinchi choragida 24,3% va 2024-yilning birinchi yarmida 23,8% ni tashkil etdi.
Sof foyda 2024-yilning ikkinchi choragida 110 mlrd so‘mga (2023-yilning ikkinchi choragiga nisbatan 101% ga o‘sish) va 2024-yilning birinchi yarmida 196 mlrd so‘mga yetdi (o‘tgan yilning shu davriga nisbatan 81% o‘sish). 2024-yilning birinchi yarmida TBC Bank Group sof foydasining 7% TBC Uzbekistan’ga to‘g‘ri keldi. Kapital rentabelligi (ROE) mos ravishda 2024-yilning ikkinchi choragida 28% va 2024-yilning birinchi yarmida 26% ni tashkil etdi.
Mijozlar bazasining o‘sishi: 2024-yil 30-iyun holatiga ko‘ra, TBC Uzbekistan’da 15,7 million unikal foydalanuvchi ro‘yxatdan o‘tgan (2023-yil oxirida — 13,2 million), bu esa uni Markaziy Osiyodagi eng yirik raqamli bank ekotizimlari qatoriga kiritdi. Oylik faol foydalanuvchilar soni 4,7 million deb qayd etildi.
Boshqa muhim voqealar:
2024-yil iyun oyida Fitch reyting agentligi TBC Bank Uzbekistan’ga barqaror prognoz bilan «BB-» darajasida uzoq muddatli emitent defolt reytingini (IDR) berdi, bu esa O‘zbekistonning suveren reytingiga mos keladi.
2024-yil iyun oyida TBC Bank Uzbekistan Shveytsariyaning impakt-aktivlarini boshqaruvchi responsAbility Investments AG kompaniyasidan 126 mlrd so‘m miqdorida kredit jalb qildi. Bu kompaniyaning fond manbalarini kengaytirish va kredit portfelining yanada o‘sishini ta’minlash strategiyasini amalga oshirishda muhim qadamdir.
2024-yil iyul oyida TBC Bank Uzbekistan o‘zining aksiyadorlari bo‘lgan TBC Bank Group PLC, Yevropa tiklanish va taraqqiyot banki (YeTTB) va Xalqaro moliya korporatsiyasi (IFC) lardan 481 mlrd so‘mlik rekord sarmoyani jalb qildi. Bu bankga yanada faol rivojlanish, kredit portfelining yuqori o‘sish sur’atini saqlab qolish va yangi mahsulotlarni chiqarishga sarmoya kiritish imkonini beradi.
Nika Kurdiani, TBC Uzbekistan bosh direktori:
"TBC Uzbekistan faol o‘sib bormoqda: biz biznesni kengaytirish, rentabellikni oshirish va TBC Bank Group natijalariga hissa qo‘shishni davom ettirmoqdamiz.
Bizning diversifikatsiyalangan biznes modelimiz o‘z samaradorligini isbotladi va barcha asosiy ko‘rsatkichlar bo‘yicha kompaniyaning ajoyib o‘sish sur’atini ta’minlab kelmoqda: 2024 yilning birinchi yarmida sof foyda 196 mlrd so‘mga yetdi, shu bilan birga kredit portfeli ikki baravardan ziyod ko‘payib, 5 trillion so‘mni tashkil etdi, depozit portfeli esa o‘tgan yilning shu davriga nisbatan 61% barqaror o‘sishni ko‘rsatmoqda.
O‘zbekiston iqtisodiyoti bundan keyin ham o‘sib boradi: mutaxassislarning hisob-kitoblariga ko‘ra, 2030 yilga kelib mamlakat YaIM deyarli ikki baravar o‘sadi va biz ushbu o‘sish salohiyatini ro‘yobga chiqarish uchun ideal pozisiyadamiz. Bizda deyarli 16 million ro‘yxatdan o‘tgan unikal foydalanuvchilar va 5 millionga yaqin oylik faol foydalanuvchilar bor va biz allaqachon Markaziy Osiyodagi eng yirik raqamli moliyaviy ekotizimlardan birimiz. Biz biznesimizning transformatsion o‘sish bosqichidamiz va mijozlarimiz uchun yangi mahsulot va xizmatlarni joriy etish uchun astoydil harakat qilmoqdamiz".
Reklama huquqi asosida
Izoh (0)