Toshkent metropolitenining “Alisher Navoiy” va “Paxtakor” bekatlari navigatsiya belgilari yangilandi. Loyiha TBC Bank va payme tashabbusi bilan amalga oshirildi.
Toshkent shahrida o‘tkazilgan yangi navigatsiya tizimi taqdimotida dizaynerlar, jurnalistlar va blogerlar ishtirok etdi.
Tadbirda navigatsiya odamlarning metro bekatlarida harakatlanishi uchun qulaylik yaratuvchi muhim vosita ekani aytildi.
Metropoliten yo‘nalishlarining yangi belgilari va ko‘rsatkchilarini “Byuro Gorbunov” art–direktori Ilya Birman boshchiligidagi TBC Bank va payme dizaynerlari jamoasi yaratdi. Ilya Birman transport tizimlari va navigatsiya yechimlari bo‘yicha butun dunyoga mashhur dizayner hisoblanadi.
“Navigatsiya belgilari odamlar metro kassasi qayerda ekani, qaysi poyezd qayerga yurishi va qancha stansiya qolganini bilishlari uchun kerak. Ko‘rsatkichlar bekat arxitekturasini buzmasligi, aksincha uni bezashi va boyitishi muhim. Biz metro poytaxt aholisi va mehmonlari uchun tushunarli hamda qulay bo‘lishi uchun zarur qadamlarni qo‘ymoqdamiz. Navigatsiya tizimini takomillashtirish ustida ishlayapmiz, – dedi Ilya Birman taqdimotdagi chiqishida.
Yangilangan navigatsiya tizimi quyidagi belgilar va ko‘rsatkichlarni o‘z ichiga oladi:
- Metroga ko‘chadan kirish;
- Bekat nomi va u qaysi liniyada joylashgani;
- O‘tish bekatida kerakli platformani topish;
- Poyezd platformaning qaysi tomonidan kelishi;
- Chiqish yoki boshqa liniyaga o‘tish belgilari;
- Shaharda kerakli joyga chiqish yo‘nalishi.
Bugungi kunda metrodan kuniga 500 mingdan 1 million nafargacha yo‘lovchi foydalanadi. Barcha bekatlar soni 50 ta.
“Toshkent metropoliteni” DUK boshlig‘ining o‘rinbosari Elyor Eltayevning aytishicha, bir necha yildan beri metro navigatsiyasini yangilash rejasi bo‘lgan.
“Bu loyiha Toshkent metropolitenidagi barcha yo‘nalishlar belgilarini almashtirishni ko‘zda tutadi. Hozir metro bekatlarining chiqish va kirish qismlarini “Yandeks”da ko‘rinishi, avtobuslar yo‘nalishi bilan bog‘lash ustida ishlanmoqda. “Alisher Navoiy” va “Paxtakor” bekatlari navigatsiyasi pilot loyiha hisoblanadi. Uning kamchiliklari aholi va mutaxassislar bilan muhokama qilinadi. Yil oxirigacha ikkita yo‘nalish navigatsiyasini yakuniga yetkazishni reja qilganmiz”, – metropolitan vakili.
Yangi navigatsiya tizimida metroga kirish va chiqish nuqtalari raqamlar bilan belgilandi. Bu yo‘lovchilar uchun harakatlanishni osonlashtiradi. Raqamlar orqali tezda kerakli chiqish yo‘lini topish mumkin bo‘ladi.
Raqamlash butun o‘tish bekati markazini qamrab oladi. Masalan, “Paxtakor” va “Alisher Navoiy” bekatlaridagi chiqishlar “1” dan “7”gacha bo‘lgan sonlar bilan raqamlandi.
Navigatsiya tizimida ranglarga ham alohida eʼtibor qaratilgan. Masalan, metro liniyasi sxemalaridan tortib eng kichik belgilarigacha yagona rang tizimi qo‘llanilmoqda. Bunda birinchi uchta liniya odatdagi ranglarini saqlab qoldi — qizil, ko‘k va yashil. To‘rtinchi liniya esa sariq rangda ko‘rsatiladi.
“Jamoamiz bilan har doim odamlar hayotini yengilroq qilishga intilamiz. Poytaxt metrosining yangi navigatsiya dizayni – bizning yo‘lovchilar harakatlanishini qulaylashtirishga qo‘shgan hissamizdir. Chunki qulay va tushunarli navigatsiya – shahar hayotining muhim qismi, – dedi TBC Bank va payme marketing bo‘yicha direktori Nodira Shermatova.
Taqdimotda aytishilicha, yangilangan navigatsiya tizimida metropolitenning har bir bekati mazmuniga xos rasmlar ham o‘rnatiladi. Masalan, “Bodomzor” bekati orqali Toshkent teleminorasi yaqinidan chiqish mumkin. Shuning uchun ham bekatda teleminoraning rasmi aks ettiriladi. Bu yo‘lovchilarga manzilni topishda tushunarliroq yechimdir.
Navigatsiyalar dizayni yo‘lovchilar fikridan kelib chiqib, yanada takomillashtirilishi rejalashtirilgan. Siz ham bu boradagi fikrlaringizni ushbu havolaga kirib, qoldirishingiz mumkin.
Reklama huquqi asosida
Izoh (0)