Birlashgan Millatlar Tashkiloti Yaqin Sharqdagi mojaroning barcha tomonlari vazminlik ko‘rsatishini istaydi va mintaqadagi vaziyatni yumshatish uchun faol harakat qilmoqda. Bu haqda BMT bosh kotibi matbuot kotibi o‘rinbosari Farxon Haq brifingda ma’lum qildi.
“Biz barcha tomonlarni vazmin bo‘lishga chaqiramiz. Hozir vaziyat kutilmagan tarzda nazoratdan chiqib ketishi mumkin bo‘lgan holatdamiz, biz bundan qochishni istaymiz va bu borada ishlayapmiz”, dedi u.
Avvalroq Eron tashqi ishlar vaziri Ali Bagheri Kani HAMAS harakati Siyosiy byurosi raisi Ismoil Haniyaning o‘ldirilishi uchun Isroilga javob qaytarishga tayyorligini, chunki BMT Xavfsizlik Kengashi Isroilning agressiv harakatlariga to‘g‘ri baho bermaganini aytib o‘tgandi.
31-iyul kuni BMT Xavfsizlik Kengashining Ismoil Haniya vafotidan keyin Eron talabiga binoan chaqirilgan favqulodda yig‘ilishi bo‘lib o‘tdi. Xavfsizlik Kengashiga raislik qiluvchi Rossiya falastinlik siyosatchining o‘ldirilishini qoralovchi matbuot bayonotini qabul qilishni taklif qildi, biroq Buyuk Britaniya, AQSH va Fransiya hujjatni blokladi.
31-iyul kuni HAMAS Eronning saylangan prezidenti Mas’ud Pezeshkiyonning inauguratsiya marosimida ishtirok etish uchun kelgan Ismoil Haniya Tehrondagi qarorgohiga Isroil tomonidan uyushtirilgan zarba natijasida halok bo‘lganini e’lon qilgandi.
Izoh (0)