Эронда 7 август куни мамлакатнинг камида 29 фуқароси қатл қилинган. Бу ҳақда халқаро инсон ҳуқуқлари ташкилотлари берган хабарларга асосланиб, Al Arabiya нашри хабар берди.
![](/static/2024/08/08/reuters1-H9Z35sQC.jpg)
Чоршанба куни 29 нафар маҳкум осиб ўлдириш тартибидаги жазога ҳукм қилинган. Улардан 26 нафари қамоқхонада гуруҳ тарзида ўлдирилган. Айрим мутахассислар ўлдирилганлар сони эълон қилинганидан анча кўп бўлганини тахмин қилган.
Норвегияда жойлашган “Эрон инсон ҳуқуқлари ташкилоти” қатл ҳолатлари ҳақида нисбатан батафсил маълумот берган. Унга кўра, оммавий қатл Теҳрон ташқарисидаги Караж шаҳрида, Гезел Ҳесар қамоқхонасида амалга оширилган.
Осиб ўлдирилган фуқаролар қотиллик, гиёҳванд моддалар ташиш ва етиштириш, зўрлаш ҳамда зўравонликда айбланган. Ўлимга ҳукм қилинганлар орасида икки нафар афғон фуқароси ҳам бўлгани айтилади.
Халқаро ташкилотлар оммавий қатлларни тўхтатиш учун Эронга босим ўтказишга чақирган. Эрон қамоқхоналарида қанча одам ўлдирилгани номаълумлиги, яқин ҳафталарда яна оммавий қатллар содир бўлиши мумкинлиги хабар берилган.
“Халқаро ҳамжамият бу ҳолатга зудлик билан жавоб бермаса, яқин ойларда юзлаб одамлар Ислом Республикасининг қотиллик машинаси қурбонига айланиши мумкин”, деган Халқаро инсон ҳуқуқлари ташкилоти директори Маҳмуд Амири-Муғаддам.
Инсон ҳуқуқлари ташкилотлари Эронда жорий йилда қатл этилганлар сони 345 кишига етганини хабар қилган. Ислоҳотчи Масъуд Пезешкиённинг мамлакатга президент бўлиши ҳам бу тизимга ҳозирча чек қўя олмаган.
Изоҳ (0)