Olimpiada kino va moda sohasidagi ko‘plab insonlarni ham o‘ziga jalb etib kelgan. Garchi bugungi qahramonlar shou-biznes sohasida mashhurlikka erishgan bo‘lsa-da, yoshliklarida ular professional sportchi va Olimpiya o‘yinlari ishtirokchisi bo‘lishni orzu qilishgan.
Jeyson Steytem
“Chegarasizlar-4”, “Fortuna operatsiyasi” va “Meg-2: tubsizlik”, “Forsaj” kabi filmlar orqali tanilgan Gollivud aktyori Jeyson Steytem 1988—1992-yillarda suvga sakrash bo‘yicha Olimpiada saralash bosqichida qatnashgan, biroq ikkala martada ham muvaffaqiyatsizlikka uchragan.
“Men hech qachon Olimpiadaga chiqa olmaganimdan afsuslanaman”, degan edi yulduz 2016-yilda. Shunga qaramay Steytem Hamdo‘stlik o‘yinlarida va mazkur sport bo‘yicha boshqa musobaqalarda o‘z mamlakatini himoya qilgan.
Vera Vong
Mashhur modelyer Vera Vong yoshligida figurali uchish bo‘yicha Olimpiada ishtirokchisi bo‘lishni orzu qilgan. U sherigi Jeyms Styuart bilan birga 1968-yilgi o‘yinlarda qatnashishga urinib ko‘rdi, ammo saralash bosqichidan o‘ta olmadi. Aynan ushbu omadsizlik Veraning moda olamiga kirib kelishiga turtki bo‘ldi.
South China Morning Post gazetasiga bergan intervyusida Vera Vong shunday deydi:
“Olimpiya o‘yinlarida ishtirok etish baxti nasib qilmaganidan so‘ng jiddiy tushkunlikka tushib qoldim. Figurali uchish sporti bo‘yicha qilgan mehnatim besamar bo‘lganidan qattiq xafa edim. Shundan so‘ng men bir necha oy vaqtimni Parijda o‘tkazdim va u yerda dizaynerlik sohasiga qiziqishim borligini anglab yetdim”.
Bryus Dikinson
Britaniyalik rok musiqachisi, Iron Maiden guruhining yetakchisi Bryus Dikinson bir vaqtlar qilichbozlik musobaqalarida qatnashishdan voz kechishga qaror qilgan va og‘ir metall yo‘nalishidagi musiqa sohasida ishlashni lozim topgan.
Bryus Dikinson 23 yoshida o‘z davrining mahoratli sportchilaridan biri hisoblangan va Buyuk Britaniyaning yettinchi raqamli eng yaxshi qilichbozi deb topilgan.
Kodi Simpson
Avstraliyalik qo‘shiqchi, raqqos va aktyor Kodi Simpson professional suzuvchi sifatida 2020 va 2024-yilgi Olimpiya o‘yinlariga yo‘llanmani qo‘lga kiritishga harakat qilgan. Afsuski, u ikkala urinishda ham muvaffaqiyatsizlikka uchragan va 2024-yilgi Olimpiada saralash bosqichida Metyu Templga atigi yarim soniyaga yutqazgan.
Garold Sakata
Kelib chiqishi yaponiyalik bo‘lgan Amerika aktyori Garold Sakata esa orzusidagi Olimpiya medalini qo‘lga kiritishga muvaffaq bo‘lgan. U 1948-yilgi Olimpiadada og‘ir atletika bo‘yicha Qo‘shma Shtatlar nomidan qatnashgan va kumush medalni qo‘lga kiritgan.
Garold Jeyms Bond haqidagi filmlarda yozuv obraz timsoli sifatida ko‘pchilikning yodida qolgan.
Izoh (0)