Олимпиада кино ва мода соҳасидаги кўплаб инсонларни ҳам ўзига жалб этиб келган. Гарчи бугунги қаҳрамонлар шоу-бизнес соҳасида машҳурликка эришган бўлса-да, ёшликларида улар профессионал спортчи ва Олимпия ўйинлари иштирокчиси бўлишни орзу қилишган.
Жейсон Стейтем
“Чегарасизлар-4”, “Фортуна операцияси” ва “Мег-2: тубсизлик”, “Форсаж” каби фильмлар орқали танилган Голливуд актёри Жейсон Стейтем 1988—1992 йилларда сувга сакраш бўйича Олимпиада саралаш босқичида қатнашган, бироқ иккала мартада ҳам муваффақиятсизликка учраган.
“Мен ҳеч қачон Олимпиадага чиқа олмаганимдан афсусланаман”, деган эди юлдуз 2016 йилда. Шунга қарамай Стейтем Ҳамдўстлик ўйинларида ва мазкур спорт бўйича бошқа мусобақаларда ўз мамлакатини ҳимоя қилган.
Вера Вонг
Машҳур моделер Вера Вонг ёшлигида фигурали учиш бўйича Олимпиада иштирокчиси бўлишни орзу қилган. У шериги Жеймс Стюарт билан бирга 1968 йилги ўйинларда қатнашишга уриниб кўрди, аммо саралаш босқичидан ўта олмади. Айнан ушбу омадсизлик Веранинг мода оламига кириб келишига туртки бўлди.
South China Morning Post газетасига берган интервьюсида Вера Вонг шундай дейди:
“Олимпия ўйинларида иштирок этиш бахти насиб қилмаганидан сўнг жиддий тушкунликка тушиб қолдим. Фигурали учиш спорти бўйича қилган меҳнатим бесамар бўлганидан қаттиқ хафа эдим. Шундан сўнг мен бир неча ой вақтимни Парижда ўтказдим ва у ерда дизайнерлик соҳасига қизиқишим борлигини англаб етдим”.
Брюс Дикинсон
Британиялик рок мусиқачиси, Ирон Маиден гуруҳининг етакчиси Брюс Дикинсон бир вақтлар қиличбозлик мусобақаларида қатнашишдан воз кечишга қарор қилган ва оғир металл йўналишидаги мусиқа соҳасида ишлашни лозим топган.
Брюс Дикинсон 23 ёшида ўз даврининг маҳоратли спортчиларидан бири ҳисобланган ва Буюк Британиянинг еттинчи рақамли энг яхши қиличбози деб топилган.
Коди Симпсон
Австралиялик қўшиқчи, раққос ва актёр Коди Симпсон профессионал сузувчи сифатида 2020 ва 2024 йилги Олимпия ўйинларига йўлланмани қўлга киритишга ҳаракат қилган. Афсуски, у иккала уринишда ҳам муваффақиятсизликка учраган ва 2024 йилги Олимпиада саралаш босқичида Метю Темплга атиги ярим сонияга ютқазган.
Гаролд Саката
Келиб чиқиши япониялик бўлган Америка актёри Гаролд Саката эса орзусидаги Олимпия медалини қўлга киритишга муваффақ бўлган. У 1948 йилги Олимпиадада оғир атлетика бўйича Қўшма Штатлар номидан қатнашган ва кумуш медални қўлга киритган.
Гаролд Жеймс Бонд ҳақидаги фильмларда ёзув образ тимсоли сифатида кўпчиликнинг ёдида қолган.
Изоҳ (0)