O‘zbekistonda havo harorati biroz pasayishidan so‘ng yana ko‘tarilishi kutilmoqda

Bugun va ertaga O‘zbekiston hududi bo‘yicha havo haroratining  biroz pasayishi kutilmoqda, deb xabar berdi “O‘zgidromet”.

Ma’lum qilinishicha, 29—30-iyul kunlari kunduzgi havo harorati 34-38 daraja atrofida, faqat janubda ba’zi joylarda 41-44 darajagacha bo‘ladi. Ish haftasining o‘rtasidan oxirigacha harorat foni 2-3 darajaga ko‘tariladi. Hududning katta qismida kunduz kunlari havo 39-41 darajagacha isiydi.

Shamol 7-12 metr/sekund tezlikda esadi, ba’zi joylarda 13-18 metr/sekundgacha kuchayadi, 29—31-iyulda cho‘l hududlarda ba’zida 20-23 metr/sekundgacha kuchayishi, chang-to‘zon bilan kuzatilishi mumkin.

Toshkentda havo kam bulutli bo‘ladi, yog‘ingarchilik kutilmaydi. Shamol sharqdan 3-8 metr/sekund tezlikda esadi, ba’zi joylarda 10-12 metr/sekundgacha kuchayadi.

Harorat asosan kechalari 22-25 daraja, kunduz kunlari 29—30-iyulda 36-38 daraja, 31-iyul va 1—2-avgustda 38-41 daraja bo‘ladi.