Shu kunlarda “Men Selin Dionman” hujjatli filmi Prime Video striming platformasida namoyish etildi. Bu xonandaning orzulari, oilasi va karyerasidagi ko‘tarilishlaridan tortib, bugungi azobli kunlari haqidagi hikoyadir.
Selin Dion — pop musiqaning oltin ovozi, balladalar malikasi. U o‘smirlik davridayoq mashhur bo‘lgan. Uning karyerasi 80-yillarda boshlangan va 2020-yillarning boshlarigacha davom etgan. Selin Dion stadionlarni to‘ldirib qo‘shiq kuyladi, millionlab pul topdi, baxtli turmush qurdi va uch nafar farzandni dunyoga keltirdi. Keyinchalik unga kamdan kam uchraydigan va hozirgacha davosi yo‘q kasallik — mushaklar qotib qolishi sindromi tashxisi qo‘yildi, shuning uchun u endi kuylay olmaydi, bu haqda qo‘shiqchi 2022-yilda muxlislariga aytgan. Deyarli 40 yillik olamshumul karyerasidan keyin nafaqaga chiqish unchalik yomon emasdek tuyuladi. Ammo bu majburiy kasallik ta’tili Selin Dionni halokatli darajada baxtsiz qildi.
Ovoz bilan bog‘liq kutilmagan muammolar
Selin Dionga juda kam uchraydigan kasallik — mushaklar qattiqligi sindromi tashxisi qo‘yilgan. U milliontadan bir yoki ikki kishida uchraydi, shuning uchun kam o‘rganilgan. Uning rivojlanishiga stress yoki baland tovushlar, sezgirlikning oshishi sabab bo‘lishi mumkin, deb taxmin qilinadi va tabiiyki, taniqli qo‘shiqchi hayotida bularning barchasi ko‘p bo‘lgan. Sindrom mushaklar qotib qolishi va og‘riqli spazmlar ko‘rinishida o‘zini namoyon qiladi. Bugungi kunda uni davolab bo‘lmaydi, faqat simptomlarni yo‘qotish mumkin. Selin Dion kasallikning dastlabki belgilariga 17 yil oldin duch kelgan.
“Bir kuni ertalab nonushta qildim. Odatdagidek ovqatlanganimdan keyin ovozim balandlashdi. Bu meni biroz qo‘rqitdi, chunki konsertdan bir kun oldin bor ovozdan foydalanilsa, aksincha ovoz biroz pastroq bo‘lishi kerak edi”.
Vokal spazmlar tez-tez yuzaga kelib, mushak spazmlari ularga qo‘shila boshladi. Avvaliga Selin bunga dosh berishga harakat qildi — agar u sahnada o‘zini yomon his qilsa, mikrofonni tomoshabinlarga qaratib, ularni kuylatishi kerak edi. Ammo o‘tgan yildan boshlab ahvoli yomonlashadi, ba’zida hatto yura olmay qoladi.
2022-yil dekabr oyida Selin barcha konsertlarini bekor qildi va muxlislari uchun sog‘lig‘iga g‘amxo‘rlik qilishdan boshqa iloji yo‘qligini aytgan video e’lon qildi.
Mevasiz qolgan olma daraxti
Ammo u sahnada bo‘lishni, qo‘shiq aytishni va jamoatchilik bilan muloqot qilishni sog‘inadi.
“Ushbu sindrom paydo bo‘lishidan oldin ovozim hayotdagi yo‘lboshchim edi. Men unga ergashdim, chunki bu menga quvonch baxsh etdi. O‘z ovozingiz sizga yoqsa, ichingizdagi eng yaxshi tomonlaringiz ochiladi”, deydi Selin.
Hujjatli filmda Dion nafaqat uning ovoziga nima bo‘layotganini tushuntiradi, balki uni ko‘rsatadi ham — u qo‘shiq aytishga harakat qiladi. Bir paytlar jarangdor bo‘lgan ovozi titraydi va buziladi, qo‘shiqchi yig‘laydi va buni eshitish, ko‘rsatish unga og‘riqli ekanini aytadi.
Selin Dion filmda nafaqat kasalligi haqida, balki sahna liboslari, poyabzallarga bo‘lgan muhabbati, musiqachilari va yordamchi-vokalchilarini qanday qadrlashi haqida gapiradi. U oilasi haqida shunday deydi:
“Farzandlarim kichikligidagi barcha narsalarni esdalik sifatida olib qo‘yganman: ularning birinchi o‘yinchoqlari, kiyimlari, tebranma oti. Arzimas narsalargacha hammasini eslayman, ular men uchun qadrli”.
Xonanda o‘zining katta oiladagi bolaligini ham eslab o‘tadi — oilada undan tashqari yana 13 farzand bo‘lgan, u saratondan vafot etgan turmush o‘rtog‘i Rene Anjelil haqida ham gapiradi. Ammo yana uning hayotini oldin va keyinga bo‘lgan kasallik — mushak qotib qolishi sindromiga qaytdi.
Selin filmda juda chiroyli badiiy metafora ishlatgan:
“Men olma daraxtiga o‘xshayman — odamlar mendan olma olish uchun navbatda turishadi. Men ularga eng yaxshilarini beraman. Hamma tabassum va to‘la savatlar bilan mamnun holda ketadi. Ammo keyinchalik shoxlarim sinib, quriy boshlaydi. Olmalarim kamayib bormoqda, lekin navbatda hali ko‘p odamlar bor. Ularga berish uchun hech narsam bo‘lmagandan keyin odamlarni kutishga majbur qilishni xohlamayman”.
Sizni baxtli qilgan narsa o‘ldiradi
Selin Dion mashaqqatli mehnatga begona emas — u har kuni shaxsiy sport terapevti bilan ishlaydi, soatlab bir nechta dori-darmonlarni qabul qiladi va qayta tiklanish uchun kurashadi. Yagona muammo shundaki, o‘ziga juda yoqqan ishi uning ahvolini yomonlashtiradi.
Odamlar kam uchraydigan kasalliklar haqida ko‘p narsa bilmaydi; hatto shifokorlar ham ularni har doim aniqlay olmaydi. Olimlarni bu mavzu qiziqtirmaydi, qiziqtirganda ham ularga tegishli mablag‘ ajratilmaydi. Selin Dion qattiq mushak sindromi bo‘yicha tadqiqotlarga sarmoya kiritmoqda, ammo uning qiziqishi va yaxshi tushunilmagan kasallikni yengish uchun vositalari kam. O‘zi va ushbu kasallikdan azob chekayotgan boshqa odamlar uchun xonanda og‘riqli hayotini ekranda ko‘rsatishga ruxsat berdi. Tushunarsiz tibbiy atamani eshitish bir narsa, kasallik tufayli umrbod mehnatidan ayrilgan tirik odamning azobini ko‘rish boshqa narsa.
Selin Dionning butun hayoti hikoya qilingan mazkur filmdan ko‘z uzib bo‘lmaydi. Tomoshabin oldida superyulduz emas, balki tirik odam paydo bo‘ladi — azob chekayotgan, hayotga chanqoq, zaif va ayni paytda kuchli. Selin juda ko‘p yig‘laydi va tashxis haqidagi his-tuyg‘ularini yashirishga harakat qilmaydi. Ammo shu bilan birga, u buni qabul qilishdan bosh tortadi. U sog‘lig‘ini va qo‘shiq aytish qobiliyatini tiklash uchun qo‘lidan kelgan barcha ishni qilmoqchi:
“Menda doim zaxira rejalar bo‘lgan. Men shunaqaman. Agar yugura olmasam, yuraman; yura olmasam, emaklayman. Lekin taslim bo‘lmayman. Men taslim bo‘lmayman!”, deydi film so‘ngida Selin.
Izoh (0)