Toshkent shahrida 3-4-iyul kunlari “Buyuk ajdodlar merosi – III Renessans poydevori” mavzusida O‘zbekiston olimlari forumi bo‘lib o‘tdi. Bu haqda “Daryo” muxbiri xabar berdi.
Tadbir doirasida hozirda qurilishi davom etayotgan Islom sivilizatsiyasi markazi fondini boyitish bo‘yicha olimlar, muzey va kutubxona vakillari o‘rtasida muhokamalar tashkil etildi. Takliflar bildirildi.
Markaz direktori Firdavs Abduxoliqovning aytishicha, olimlar 9 ta yo‘nalish bo‘yicha muloqot qildi.
Forumda O‘zbekistonning barcha hududlaridan kelgan 450 nafar olimlar o‘zaro fikr almashdilar. Fondimizni boyitish yuzasidan yaxshi takliflar berildi. Endi bu g‘oyalarni amalga oshirish ishlarini boshlaymiz. O‘zbekistondan buyuk insonlar yetishib chiqqan. Maqsadimiz ularning bebaho meroslarini o‘rganib, xalqimizga, ayniqsa yoshlarga yangicha uslublarda yetkazish, dedi markaz rahbari.
Rejaga ko‘ra, binoning katta qismi “Islom sivilizatsiyasi tarixi” muzeyi uchun ajratiladi. Muzey tarixiy voqealar xronologiyasi asosida 9 bo‘limni o‘z ichiga oladi. Ular “Qurʼon” zali, Markaziy Osiyoda islomgacha bo‘lgan davr, mintaqaga islomning kirib kelishi, taʼlim, ilm-fan, hunarmandchilik va sanʼat, meʼmorchilik, anʼanalar tarixi va Yangi O‘zbekiston oid bo‘limlardir.
“Qurʼon” zali 800 kvadrat metrdan ortiq joyni egallaydi. Zal markaziga bebaho va mo‘tabar meros — Hazrati “Mus’hafi Usmon” joylanadi.
Shu bilan birga, markaz binosidan tarixiy anʼanalar va zamonaviy texnologiyalarni o‘zida jamlagan yirik kutubxona o‘rin oladi. Islom sivilizatsiyasi markazi Hastimom majmuasi, O‘zbekiston musulmonlari idorasi, Xalqaro islom akademiyasi bilan yonma-yon qurilib, yaxlit kompleks hosil qiladi.
Firdavs Abduxoliqov “Daryo” muxbiri bilan suhbatda yana bir masalaga to‘xtaldi. Yaʼni O‘zbekiston madaniy meroslarining bor-yo‘g‘i 15 foizi mamlakatda, qolgan 85 foizi chet davlatlariga olib chiqib ketilgan.
Maqsadlarimizdan biri turli sabablar bilan xorijga chiqib ketgan tarixiy manbalarimizni qaytarish. Albatta, ularning originalini bizga hech kim bermaydi. Lekin mulyajlar turibdi, faksimil tarzida yoki nusxalarini olib kelishimiz kerak. Ularning ko‘rinishi originalidan farq qilmasligi lozim. Muzeyimiz shunday kontent bilan bilan boyitilsa, kirgan odam lol qoladi. O‘zbek xalqining jahon sivilizatsiyasiga qanday hissa qo‘shganini dalillar bilan yaqqol ko‘rsatib beramiz, dedi markaz direktori.
Forum doirasida ishtirokchilar Islom sivilizatsiyasi markaziga tashrif buyurdi. Quruvchilar binoning o‘zi ikki gektarni, majmuaning umumiy maydoni esa 7 gektarni tashkil etishini aytdi.
Markaz qurilishi deyarli yetti yildan beri davom etmoqda. Rejaga asosan, jarayon 2023-yilda yakunlanishi kerak edi. Biroq pandemiya sabab mahsulotlar yetkazib berish va qurilish ishlari kechikkan. Markaz joriy yil so‘ngigacha qurib bitkazilishi kutilmoqda.
Izoh (0)