Amsterdamda 33 yoshli boshpanasiz erkak, ikki yosh bolaning otasi Hadjer Al-Ali ichida 2 ming yevro bo‘lgan hamyonni topib oldi va uni politsiya mahkamasiga topshirdi. Bu haqda u mahalliy De Stentor gazetasiga bergan intervyusida aytib berdi.
Hadjer Amsterdam markaziy vokzalida bo‘sh plastik quti va shisha butilkalarni qayta ishlash markaziga topshirish uchun terib yurgan, so‘ng tasodifan hamyonni ko‘rib qolgan. Uning so‘zlariga ko‘ra, hamyonda “ko‘p pul bo‘lgani sababli” egalari uni izlashiga amin bo‘lgan:
“Ehtimol, kimdir pulni farzandi uchun yoki davolanish uchun yig‘ib yurgandir. Balki ular haqiqatan ham shu pulga muhtoj odamdir”, — deydi Al-Ali.
Erkak hamyonni politsiyaga olib borganida, uning ezgu amali uchun “kumush barmoq” nomli kichik mukofot va 50 yevrolik sovg‘a sertifikati berildi.
Bundan xabar topgan GoFundMe platformasi foydalanuvchilari tez orada Al-Ali uchun xayriya yig‘ini tashkil qildi va unga 34 ming yevro yig‘ib berishdi. GoFundMe sahifasida aytilishicha, erkak bir yarim yildan beri ko‘chada yashaydi va hozirda uning ikki nafar farzandi bor.
Al-Ali pulni uy ijarasiga hamda hayotini o‘z yo‘liga qo‘yishga harakat qilish uchun sarflash niyatida. Shuningdek, saxovatpesha ko‘plab insonlar unga yaxshi ish takliflarini ham bergan.
Mart oyida amerikalik kollej o‘quvchilari maktab qo‘riqchisi uyga borishi uchun GoFundMe’da 20 ming dollardan ko‘proq mablag‘ to‘plashdi va 11 yildan beri oilasini ko‘rmagan qo‘riqchi oilasini ko‘rishga muvaffaq bo‘ldi.
Izoh (0)