Fransiyalik ayol 20 yil davomida ishlamasa ham oylik maosh bergan kompaniyani sudga berdi

Fransiyalik ayol aloqa xizmatlarini ko‘rsatuvchi dunyodagi eng yirik telekommunikatsiya operatorlaridan biri bo‘lgan Orange kompaniyasini sudga berdi. U avval shu korxonada uzoq vaqt davomida ishlagan. Da’vogarning so‘zlariga ko‘ra, sobiq ish beruvchi ayolga 20 yil davomida hech qanday topshiriq bermasdan oylik maosh to‘lagan. Ayblovchi buni o‘ziga nisbatan psixologik tazyiq va kamsitish deb atamoqda.

Lourens Van Vassenxov 1993-yilda kadrlar bo‘limi kotibasi sifatida ishga olingan. Ish beruvchi kompaniya ayolning gepimplegiya (tananing bir qismi shol bo‘lishi) va epilepsiya (tutqanoq) bilan kasallanganidan xabardor edi. Shuning uchun uning jismoniy holatiga mos bo‘lgan yengil lavozimni taklif qildi.

Bir necha yil o‘tgach, Van Vassenxov Fransiyaning boshqa shahridagi filialga ish joyini ko‘chirilishini so‘radi. Biroq yangi ofis ayolning umumiy sog‘lig‘i va ehtiyojlariga moslashtirilmagan edi. Bu fakt shifokorlar tomonidan ham tasdiqlandi. Ayol sakkiz soat davomida kompyuterda o‘tirishga to‘g‘ri kelgan, bunday rejim nogiron kishi uchun mumkin emas. Shu tufayli Orange kompaniyasi imkoniyati cheklangan ayolga hech qanday topshiriq bermasdan keyingi 20 yil davomida to‘liq maosh bilan ta’minlab kelishni qaror qilgan.

Van Vassenxov advokatlarining so‘zlariga ko‘ra, kompaniya shunday hiyla yo‘l bilan uni ishdan bo‘shatishga majburlamoqchi bo‘lgan:

Nogiron insonlar ham jamiyatning bir bo‘lagi sifatida mehnat qilish, o‘z o‘rniga ega bo‘lish va ijtimoiy aloqalar yaratishi lozim. Bu holatda esa Lourens Van Vassenxovga bunday imkoniyatlar berilmadi. Unga ham barchadek ish va topshiriq berish o‘rniga shunchaki oylik to‘lab kelindi. Fikrimizcha, kompaniya ayolning ishdan o‘z xohishi bilan ketishini kutgan, — dedi Lourensning advokati.

Shu sababli Van Vassenxov unga ish berishni talab qilib sudga murojaat qildi. Kompaniya vakillarining ta’kidlashicha, ular xodimning ijtimoiy mavqeyini hisobga olgan va doimiy ravishda uning ish haqini to‘liq va o‘z vaqtida bergan. Bundan tashqari, Vassenxov ish beruvchidan bir qator imtiyozli yordam puli olgan va muntazam ravishda kasallik ta’tilida bo‘lgan.

Ayol esa Orange kompaniyasidan 700 ming AQSH dollari tovon puli talab qilmoqda.