Yamanning “Ansorulloh” harakati 25-iyun kuni Arab dengizida Isroilga aloqador kemaga zarba bergan. Bu haqda tashkilot matbuot xizmati eʼlon qilgan bayonotga asoslanib, Al Arabia manbasi xabar berdi.
Manbada aytilishicha, Yaman qirg‘oqlari atrofidan o‘tayotgan MSC Sarah V kemasi husiylarning yangi turdagi ballistik raketalari bilan nishonga olingan. “Ansorulloh” kuchlari kemaga ogohlantirmasdan zarba yo‘llagan.
Qizil dengiz va Adan ko‘rfazi qo‘shma dengiz axborot markazi dushanba kuni Liberiya bayrog‘i ostidagi kema Arab dengizida nishonga olinganini yozgan. Husiylar uchirgan raketa kemaga urilmagan. Kema keskin manyovr uyushtirib qochishga muvaffaq bo‘lgan.
Husiylar ushbu maʼlumotni rad etib, kema Isroilga tegishli bo‘lganini, undagi Liberiya bayrog‘i esa chalg‘itish uchun ilinganini maʼlum qilgan. “Ansorulloh” shuningdek, kema hujumda jiddiy shikastlanganini qo‘shimcha qilgan.
Yaman guruhining matbuot kotibi Yahyo Sariya kemaga to‘g‘ridan to‘g‘ri zarba berilganini tasdiqlagan. Hujumdan so‘ng kema, yo‘nalishini o‘zgartirib, Somali qirg‘oqlari tomon suzib ketgan.
Buyuk Britaniya dengiz savdo operatsiyalari agentligi kema ekipaji hozirda xavfsiz hududda ekanini bildirgan. U Yamanning Nishtun dengizidan 246 milya masofagacha suzib borib, to‘xtagan. Kemada jarohatlanganlar va halok bo‘lganlar haqida maʼlumot mavjud emas.
Izoh (0)