Londondagi Britaniya muzeyida 26-sentyabr kuni “Ipak yo‘llari” ko‘rgazmasi o‘z ishini boshlaydi. Unda O‘zbekistonning muzey kolleksiyalariga mansub 14 ta eksponat namoyish etiladi.
Qayd etilishicha, “Ipak yo‘llari” ko‘rgazmasida namoyish etiladigan aksariyat ashyolar, shu jumladan, shatranj donalarining eng ko‘hna to‘plamlaridan biri va Afrosiyobdagi hashamatli 6 metrlik “Elchilar xonasi” devoriy surati Londonda ilk bor namoyish etiladi.
O‘zbekiston Madaniyat va sanʼatni rivojlantirish jamg‘armasi “Ipak yo‘li” ko‘rgazmasi uchun Samarqand davlat muzey-qo‘riqxonasi hamda O‘zbekiston davlat sanʼat muzeyida saqlanayotgan 14 ta eksponatni taqdim etadi.
Ular orasida Markaziy Osiyoning Buyuk Ipak yo‘li tarixidagi ahamiyatiga dalolat bo‘luvchi Varaxsha saroyi alvon mehmonxonasining devoriy surati, qopqoqli suyakdon, so‘g‘d yozuvi tushirilgan kumush idish, Kofirqalʼa xarobasiga oid ko‘za va boshqa noyob arxeologik topilmalar mavjud.
“Ipak yo‘llari” ko‘rgazmasi 2024-yil 26-sentyabrdan 2025-yilning 23-fevraliga qadar Britaniya muzeyidagi Sainsbury ko‘rgazmalar galereyasida namoyish etiladi.
Madaniy meros agentligining 2022-yilgi ma’lumotlariga ko‘ra, respublika muzeylari fondlarida jami 2 553 056 ta muzey ashyolari va kolleksiyalari mavjud. Shundan 1 928 012 ta asosiy fondda, 625 044 ta ilmiy-yordamchi fonddagi muzey ashyolari va kolleksiyalari hisoblanadi. Muzeylarda saqlanayotgan eksponatlarning 112 mingtasi jahon miqyosida noyob hisoblanadi.
Izoh (0)