2022-yilda mashhur qo‘shiqchi Selin Dionda mushaklar qotishi sindromi aniqlandi. Shu sababli xonanda konsert dasturlari va gastrollarni bekor qilishga majbur bo‘ldi.
Kam uchraydigan va tibbiyotda hozircha davosi topilmagan mushaklar qotishi sindromidan aziyat chekayotgan kanadalik qo‘shiqchi o‘zining kasalligi tafsilotlari haqida so‘zlab berdi.
Selin Dion shu yilning noyabr oyida Keti Perrining konsertida qatnashib, muxlislarga tez orada sahnaga qaytishiga umid bergan edi. Biroq uning kasalligi doimiy og‘riqlar va noqulaylik tug‘dirgani uchun kundalik hayotida og‘ir kunlar boshlangan. Xususan, Selin qizilo‘ngach, oshqozon, umurtqa pog‘onasi va qovurg‘alarida spazmlarni his qiladi. Bundan tashqari, Selinda bir marta kuchli titroq va talvasalar bo‘lib o‘tganda uning qovurg‘alari sinib ketgan.
“Doim meni kimdir bo‘g‘ayotganga o‘xshaydi, halqumimda kuchli bosim va og‘riqni his qilaman. Qorin, umurtqa pog‘onasi yoki qovurg‘alarimda ham spazmlar bo‘lib turadi. Agar oyoqlarimni buksam, ular o‘sha holda qotib qoladi va mushaklarimni qayta o‘z holiga keltira olmayman. Hatto shunchaki taom pishirayotgan paytimda barmoqlarim va qo‘llarim ma’lum holatda qotib qoladi”, — dedi Selin Dion Today nashriga bergan intervyusida.
Uning qo‘shimcha qilishicha, Selinning tashxisi tibbiyotda hali to‘liq o‘rganilmagan va hozirgacha xonandaga yordam beradigan dori topilmagan. Lekin qo‘shiqchining qarindoshlari umidini yo‘qotmaganini, Dionning o‘zi esa sahnaga qaytishni orzu qilishini aytdi.
Izoh (0)