O‘zbekistonda 541 ta holatda ekilmagan bir milliontadan ziyod ko‘chat hisobotlarga qo‘shib yozilgani aniqlandi

O‘zbekistonda 541 ta holatda amalda ekilmagan bir milliontadan ziyod ko‘chat hisobotlarga qo‘shib yozilgani aytildi.  

Bu haqda AOKAda o‘tkazilgan brifingda Bosh prokuratura boshqarma boshlig‘i O‘ktam O‘tayev ma’lum qildi. Shuningdek, 441 ta holatda 580 ming tup ko‘chat sug‘orish tizimi mavjud bo‘lmagan joylarga ekilgan.

Bundan tashqari, 35 ta holatda yetkazib berilgan ko‘chatlar o‘z vaqtida ekilmagani sababli 19 mingdan ortiq ko‘chat nobud qilingan. 7 232  ta noqonuniy daraxt kesish holati aniqlanib, har bir nobud qilingan daraxt uchun 100 tup ko‘chatni kompensatsiya tarzida ekish majburiyati yuklandi.

Yadro fizikasi instituti bog‘i (255 gektar), “Darxon” ilmiy tajriba xo‘jaligi (29,6 gektar), “Bobotog‘” va “Zarafshon” davlat o‘rmon xo‘jaliklari hududlari to‘liq nazoratga olinib, jami 50 ming tup ko‘chat ekilishi ta’minlandi.