Akademik Azamat Ziyo prezident Shavkat Mirziyoyevga Turkiya oliy mukofotining berilishi adolatli qaror bo‘lganini aytdi. Tarixchining fikricha, davlat rahbari o‘z faoliyati davomida Turkiya va O‘zbekiston o‘rtasidagi do‘stona munosabatlarni rivojlantirishga katta hissa qo‘shmoqda.
Prezident Shavkat Mirziyoyev joriy yilning 5–7-iyun kunlari Turkiyaga tashrifi chog‘ida “Turkiya Respublikasi nishoni” bilan taqdirlandi. Mazkur oliy mukofot mamlakat prezidenti qaroriga muvofiq, Turkiya bilan do‘stona munosabatlarni rivojlantirishga katta hissa qo‘shgan davlat arboblariga beriladi.
Fanlar akademiyasi Tarix instituti direktori Azamat Ziyo “O‘zbekiston 24” telekanaliga bergan intervyusida O‘zbekiston prezidentining bunday oliy mukofotga sazovor bo‘lishi quvonarli hol ekanini aytdi.
“Men buni ham tabiiy, ham adolatli deb bilaman. Gap bu yerda faqatgina O‘zbekiston–Turkiya munosabatlari haqida emas. Masala juda chuqur. Bu yerda Shavkat Miromonovichni turkiy dunyoni birlashtirish bilan bog‘liq bo‘lgan xizmatlari yotibdi. 150 yil turkiy dunyo ishlamadi. Nega ishlamadi? Chunki unda O‘zbekiston, o‘zbek millati yo‘q edi. Turkiy dunyo yuragi, aql-zakovati, markazi bu Turon, Turkiston, O‘zbekiston. Hamma gap mana shu yurak va aqlning qanday ishlashi, o‘zini qanday tutishida. So‘ngi 33 yillik tariximiz buni yaqqol ko‘rsatdi. Biz o‘zimizning tabiiy qo‘rg‘onimiz, muhitimizdan ancha yiroqlashib ketdik. Ammo 2016-yil kuzidan o‘zbek jamiyatida vaziyat tubdan o‘zgardi. Buni bir so‘z bilan Yangi O‘zbekiston, yangilanishlar dedik. Buning ortidan Markaziy Osiyoda, Turon, Turkistonda vaziyat o‘zgardi. Keyin bu turkiy dunyoga ko‘chishi tabiiy edi. Yaʼni o‘zbek davlati, millati o‘zining o‘rniga qaytdi. O‘zining tarixiy vazifasini bajarishga qaytdi. Bu ishlarning bari tabiiy ravishda Shavkat Mirziyoyev nomi bilan, u kishining siyosati bilan bog‘liq”, — dedi senator.
Azamat Ziyoning aytishicha, so‘ngi 2000 yillikning kamida uchdan ikki qismida dunyoni turkiy kuchlar boshqargan.
“Bu turkiy kuchlar, sulolalar Turondan, Turkistondan chiqqan. Lekin ularning barchasiga turkiy dunyoni birlashtirish nasib qilmagan. Faqat Amir Temurgina turkiy dunyoni birlashtirgan buyuk inson hisoblanadi. Bunga u kishi 32 yil sarfladi. Ammo 2018-yilda O‘zbekiston turkiy kengashga aʼzo bo‘ldi. Shundan keyingina Turkiy davlatlar kengashi degan tushuncha paydo bo‘ldi. O‘zbekistonsiz bu davlatlar kengashi bo‘lishi mumkin emas edi. Bunga hammaning ham yuragi dov bera olmasdi. Buning yukini tortish oson emas. Va u Turkiy davlatlar kengashiga aylandi. Biz bugun 2024-yilda turib turkiy dunyo birlashdi deya olamizmi? Albatta, deya olamiz. Va bu jarayonga Shavkat Miromonovich 7 yilda erishdi. Men o‘ylaymanki, bu u kishining buyuk, tarixiy xizmati. Bu mukofot o‘zining munosib egasini topdi”, — dedi tarixchi.
Avvalroq qardosh mamlakatning oliy davlat mukofotini O‘zbekiston yetakchisiga Turkiya prezidenti Rajab Toyyib Erdo‘g‘on tantanali ravishda topshirgani xabar qilingandi. Shu bilan birga, Shavkat Mirziyoyev boshchiligidagi O‘zbekiston delegatsiyasining Turkiyaga tashrifi chog‘ida ko‘plab ikki tomonlama kelishuvlarga erishilgani bildirilgan.
Izoh (0)