O‘zbekistonda qimmatbaho metall va toshlarni noqonuniy qazib olganlik uchun javobgarlik kuchaytirilishi kutilmoqda.
31-may kuni deputatlar Yerni va yerosti boyliklarini asrab qolishga hamda muhofaza qilishga qaratilgan qaratilgan qonun loyihasini ko‘rib chiqib, uchinchi o‘qishda qabul qildi.
Mazkur qonun loyihasi bilan Jinoyat kodeksi, Jinoyat-protsessual hamda Ma’muriy javobgarlik to‘g‘risidagi kodekslarga qimmatbaho metallar va qimmatbaho toshlarni noqonuniy qazib olinishiga chek qo‘yish, mazkur toifadagi qilmishlar uchun javobgarlikni kuchaytirishni nazarda tutuvchi o‘zgartirish va qo‘shimchalar kiritish taklif etilmoqda.
Respublika hududida foydali qazilmalarni ruxsatnomasiz, shuningdek oltin qazuvchilar usulida qazib olinishiga chek qo‘yish va ushbu harakatlar uchun javobgarlikni kuchaytirish maqsadida Jinoyat kodeksi yangi 196-1 va 196-2-moddalari bilan to‘ldirilmoqda.
Bunga ko‘ra, foydali qazilmalarni ruxsatsiz qazib olish uchun ma’muriy javobgarlikka tortilganidan so‘ng bir yil ichida takroran sodir etish jinoiy qilmish deb baholanishi, foydali qazilmalarni oltin izlovchilar usulida ruxsatsiz qazib olish uchun to‘g‘ridan to‘g‘ri jinoiy javobgarlik belgilanmoqda.
Shuningdek, mazkur yangi normalardan kelib chiqqan holda ushbu jinoyatlarning dastlabki tergov va surishtiruv organlari tomonidan tergov qilish vakolati ichki ishlar organlari tergov bo‘linmalariga berilmoqda.
Deputatlarning ta’kidlashicha, qonun loyihasining qabul qilinishi yer va yer osti boyliklarini asrab-avaylash va muhofaza qilish bilan bog‘liq qonunchilikning ijro etilishini ta’minlashga, shuningdek ushbu sohalardagi huquqbuzarliklarning samarali profilaktikasiga xizmat qiladi.
Izoh (0)