Farg‘ona viloyati hokimi Xayrullo Bozorov AQSHning oziq-ovqat va logistika bozorlarida xizmatlarni taklif qiluvchi Natars NY Food korporatsiyasi vakillarini qabul qildi. Bu haqda viloyat hokimligi matbuot xizmati xabar berdi.
Uchrashuvda Farg‘ona viloyatida yetishtirilgan va ishlab chiqarilgan mahsulotlarning AQSHga eksporti ko‘lamini kengaytirish masalasi muhokama qilindi.
2023-yil dekabr oyida Oltiariq uzumlarini AQSH bozoriga olib kirishga vositachi bo‘lgan ushbu kompaniya vakillari, viloyat meva va sabzavotlariga Qo‘shma shtatlarda yetarli talab borligi, shuningdek, quritilgan mevalar, konservalangan mahsulotlar, meva sharbatlari, holva va boshqa milliy shirinliklarni ham amerikalik isteʼmolchilarga sinov tariqasida taqdim etish ustida ish olib borayotganliklarini maʼlum qildi.
Yaqin kunlarda Farg‘ona viloyatida yetishtirilgan va ishlab chiqarilgan qator mahsulotlarning sinov partiyalaridan iborat navbatdagi yuk AQSHga yuborilishi bildirildi. 2024-yilda Farg‘ona uzumlari ham katta miqdorda Amerikaga yetkazib berilishi va bu masalada hozirdan barcha tayyorgarliklar ko‘rilayotgani aytib o‘tildi.
Mahsulotning bozorda o‘z o‘rniga ega bo‘lishi, xaridorgirligini oshirishda uning ko‘rinishi, sifati va dizayni muhim ahamiyatga ega ekanligi qayd etilib, viloyat tadbirkorlari tomonidan bu borada yetarli ish tashkil etilishini taʼminlashga kelishib olindi.
Izoh (0)