Ijodini boshlaganiga ko‘p bo‘lmagan xonanda Jaloliddin Ahmadaliyev qisqa vaqtda muxlislar nazariga tushib ulgurgan. U uch yildan buyon yakkaxon konsert dasturini taqdim etmoqda. Qizig‘i shundaki, intervyularida musiqiy jihatdan savodsiz ekanligini aytgan xonandaning konsertiga chipta topish amrimahol. Topilganing ham narxi ancha baland. “Daryo” ijodkorlari xonandaning konsertiga tashrif buyurishdi va muxlislarni qiziqtirgan baʼzi savollarga javob olishdi.
Konsert oldi har bir xonandada hayajon bo‘ladi. Jaloliddin Ahmadaliyev faqat birinchi kun hayajonlanganini va muxlislar yangicha imijdagi konsertni qanday qabul qilisharkan, deb xavotirga tushgani haqida gapirdi.
— Kecha hayajon bor edi, bugun yo‘q. Konsert kutilgandan ham ziyoda bo‘ldi, zal muxlislar bilan to‘ldi. Bu yilgi konsertda biroz o‘zgarishlar bo‘lgani uchun odamlarga ozgina erish tuyulgan bo‘lishi mumkin-u, lekin yaxshi qabul qilishdi. Ikki yilgi konsertimiz davomida raqslardan umuman foydalanmasdik. Bu yil tashqi ko‘rinishimni va konsert programmasini biroz o‘zgartirdik. Raqqosalar ishtirokining sababiga kelsak, bir xillikdan cheklanish ham kerak. Muxlislar yaxshi qabul qilishdi, menimcha.
Xonanda konsert tayyorgarligida bergan intervyusida sirli duetdoshi haqida aytib o‘tgandi. Ammo duetdosh konsertning ilk kuni ishtirok etmadi. Buning sababini xonanda quyidagicha izohladi.
— Sirli mehmon konsertimizning so‘nggi kunida ishtirok etadi. U ayrimlar o‘ylaganidek Munisa Rizayeva yoki Ozoda Nursaidova emas. Rostini aytsam, u o‘ta mashhur xonanda emas. Ammo kimligini hozircha sir saqlayman.
Ayrim xonandalar bir necha kun “Xalqlar do‘stligi” sanʼat saroyida emas, balki bir kuni “Humo Arena”da konsert berishni maʼqul ko‘rishmoqda. Xonandaning bunga munosabati qanday?
— Men uchun “Xalqlar do‘stligi” sanʼat saroyi qulay, rizqimiz qo‘shilgan ekan bu yil ham shu yerda konsert beryapman. Keyinchalik balki men ham u yerda konsert berarman. Konsert avvalo muxlislar talabidan kelib chiqadi. Shu bilan birga, xonanda daromad ham topadi. Konsert berish baribir yoqimli jarayon.
Xonanda konsert chiptalarining ancha qimmatga sotilayotgani haqidagi eʼtirozga quyidagicha javob berdi.
— Men konsert chiptalari narxiga aralasholmayman, bu narsalarni tashkilotchilar qilishadi. Men faqat o‘zim uchun sahna dekoratsiyasini qilaman. Xuddi to‘yga kelgandek, konsertdan ham gonorar olaman. Boshqa masalalar bilan konsert tashkilotchilarining o‘zlari shug‘ullanishadi.
Xonanda sanʼatdagi raqobatga munosabati va Hamdam Sobirovga qo‘shiq yozdirmasligi haqida ham gapirib o‘tdi.
— Men hech kimga hasad qilmayman, ular bilan juda yaqin ham, uzoq ham emasman. Vodiylik ustoz sanʼatkorlar bilan aloqalarimiz yaxshi. Hamdam Sobirov haqidagi savolingizga kelsak, men undan qo‘shiq olmayman. Chunki men u yo‘nalishda kuylolmayman, bunday kuylash stilim emas, — deydi xonanda Jaloliddin Ahmadaliyev.
Konsertda to‘liq holda “Daryo”ning YouTube’dagi kanalida tomosha qilishingiz mumkin.
Izoh (0)