O‘zbekiston tashqi savdo yuklarini janubiy yo‘nalish bo‘ylab xorijga tashishda Turkmaniston muhim ahamiyatga ega. Bu haqda Transport vazirligi matbuot xizmati xabar berdi.
Maʼlum qilinishicha, tijorat maqsadida ikki mamlakat avtomobil va temir yo‘llari orqali uchinchi mamlakatga tranzit yuklari tashiladi. Ikki mamlakat kommunikatsiya tizimlarining integratsiyasi nafaqat O‘zbekistondan Turkmanistonga, balki Yaqin va O‘rta Sharq savdo bozorlariga eng qisqa yo‘l orqali chiqish imkoniyatini yaratadi.
2024-yilning yanvar-mart oyi mobaynida yuk tashuvlari hajmi salkam 400 ming tonnani tashkil etdi. 2023-yilda Turkmaniston bilan jami 36 500 dona, 2024-yilning o‘tgan davri mobaynida esa 10 mingta ruxsatnoma blankalari almashilgan bo‘lib, yuk tashuvlari uzluksizligi taʼminlanmoqda.
Turkmaniston tomoni murojaatlariga asosan Transport vazirligi tomonidan qo‘shimcha ruxsatnoma blankalari almashilmoqda.
Transport vazirligi Turkmaniston vakolatli organi bilan ruxsatnoma blankalari kvotasini ko‘paytirish va qo‘shimcha almashish, milliy tashuvchilarga xalqaro yuk tashuvlar jarayonida teng sharoitlar yaratilishini taʼminlash orqali yuk tashuvlari hajmini oshirish bo‘yicha muntazam ravishda muzokaralar olib bormoqda.
Izoh (0)