“Ўзимдан кичкина болаларнинг қўлида ўқийманми? Бу кўзбўямачилик-ку” — Хуршид Расулов янги концерти ва олий таълимда ўқишни истамагани ҳақида гапирди (фото, видео)

Айни кунларда хонанда Хуршид Расулов жонли ижродаги яккахон концерт дастурини тақдим этмоқда. “Дарё” мухбири Жаҳонгир Муртазоев концертга ташриф буюриб, саҳна орти жараёнлари ҳақида репортаж тайёрлади. Бундан ташқари, концерт олди хонандадан кўпчиликни қизиқтирган саволларга жавоб олди.

— Бу йилги концерт ҳам шов-шувли бўлмаслиги мумкин. Концертимда сўзнинг мағзини чақадиган мухлислар ташриф буюради. Бу йилги дастурда ёшлик ҳақида қўшиқ айтмайман, дегандим. Ҳар гал айтмайман дейман-у, шоирларнинг айби билан яна ёшлик ҳақида қўшиқ куйлаб қўяман. Яхши шеър ҳам худди таомдек гап — ёқса, ҳар куни ҳам ўша таомдан ейишга тайёр бўласиз.

Бу йилги концертга 27 йил аввал ижро этган қўшиқларни ҳам киритдик. Чунки ўша пайтда у қўшиқларга етарлича эътибор берилмаган. Уларни бирор марта катта саҳнада ижро этмаганим учун албатта, бир кун “Халқлар дўстлиги”да куйлайман, деб ният қилгандим, — дейди Хуршид Расулов.

Хонанда ўзбек санъатида жонли ижродаги концертларнинг сони ортгани ва баъзи қийинчиликлар юзага келгани ҳақида айтиб ўтди.

— Кундан кунга жонли ижрога бўлган эътибор кучайяпти. 2006—2007 йилларда ҳеч бир хонанда жонли ижрода концерт бермасди. Бир-иккита санъаткорларнинг жонли концерт берганини айтмаса, қолганларнинг бари фонограмма билан концертини ўтказарди. Телевидениеда ҳам жонли ижродаги кўрсатувлар ортгани учун созандалар ҳам йил сайин ўсяпти.

Илгари жонли ижрода концерт берамиз, десак қатнашишни истовчи талабгор созандалар ортиб кетарди. Ҳозир эса созандаларда илтимос қиляпмиз, жонли ижрода куйлайдиган хонандалар кўплигидан уларнинг вақти бўлмаяпти, — дейди Хуршид Расулов.

Олий таълимда таҳсил олмаган хонанда агар имкон бўлганида қайси олийгоҳда ўқишни исташи ҳақида гапирди.

— Ўзбекистон давлат консерваториясида ўқиган бўлардим. Мен тенгилар ҳам ўқишаётгани ҳақида эшитдим. Бир ўқисаммикан дедим, аммо у ерга бориб нимани ўрганаман деб ўйланиб қолдим. Кўп танишларим ўқишни тавсия қилди, аммо энди ўқий олмайман деб рад этдим. Ўзимдан кичкина болаларнинг қўлида ўқийманми, улар мени устоз деб юришади-ку, дедим. Бу кўзбўямачилик бўлади-да. Мухлислар мендан яхши қўшиқларни кутишади, уларни қувонтириб юравераман, — дейди хонанда Хуршид Расулов.

Агар концертга бориш имконингиз бўлмаган бўлса, ундан тайёрланган махсус репортажни томоша қилишингизни тавсия қиламиз.