Har bir yulduz mashhurlikka erishguniga qadar turli qiyinchiliklarni boshdan kechiradi, ko‘p kuch va mehnat sarflagach, mashhurlikka erishadi. Biroq ularning orasida tasodifan kino olamiga kirib qolganlar ham bor. Quyida o‘zlari rejalashtirmagan bo‘lsa-da, birgina uchrashuv tufayli kinoga kelib qolgan aktyor va aktrisalar haqida so‘zlashamiz.
Jonni Depp
Kelajakda aktyor bo‘lishni xayoliga ham keltirmagan Jonni Depp musiqa bilan jiddiy shug‘ullanish uchun o‘n besh yoshida maktabni tashlagan. Bir nechta musiqa guruhlarda ishlagach, Depp Lori Ellison ismli ayol bilan turmush qurdi va rafiqasi bilan Los-Anjelesga ko‘chib ketdi. U yerda ayoli Jonnini aktyor Nikolas Keyj bilan tanishtirdi. Lorri turmush o‘rtog‘ida aktyorlik mahorati borligiga ishonardi. Shundan so‘ng Depp do‘sti Jeki Heyli bilan “Elm ko‘chasidagi daxshat” (1984) filmi kastingiga bordi va tanlovdan muvaffaqiyatli o‘tdi. Shu tariqa Jonni Depp kino sanoatiga ilk qadamini qo‘ydi.
Jennifer Lourens
Aktrisa o‘n to‘rt yoshida onasi bilan Manhettenda sayohat qilib yurgan paytda unga yosh iqtidorlarni izlab yurgan agentlar murojaat qildi. Jennifer modellik uyiga taklifni qabul qilib, bir necha yil top-model bo‘lib ishladi. Lourens tez orada aktyorlik mahoratini rivojlantirishga qiziqib qoldi. Uning ilk rollari Bill Engvall shousi (2007-2009) sitkomida boshlangan. 22 yoshida Jennifer Lourens “Mening sevgilim aqldan ozgan” (“Silver Linings Playbook”) filmidagi roli uchun “Eng yaxshi aktrisa” nominatsiyasida “Oskar”ni qo‘lga kiritdi.
Jennifer Lourens aktyorlik ma’lumotiga ega emas. Bundan tashqari, u 14 yoshida maktabdagi o‘qishini tashlab ketgani uchun o‘rta ma’lumotli ham bo‘la olmagan.
Sharliz Teron
Sharliz bolaligida raqqosa bo‘lishni istardi, biroq u tizzasidan olgan jarohatidan keyin boshqa sohani tanlashga majbur bo‘ldi. Teron ijara haqini to‘lashga qiynalgan kunlarning birida bankka keladi. Bank xodimi unga juda zarur bo‘lgan chekni naqd qilishdan bosh tortganida, Teron katta janjal ko‘taradi. Uning dramatik iste’dodidan hayratga tushgan va orqasida navbatda turgan kino agenti Sharlizga tashrif qog‘ozini qoldirib ketadi. Ushbu voqea unga shou-biznesda karyerasini boshlashiga turtki bo‘ldi. 2004-yilda Sharliz Teron “Maxluq” filmidagi qotil Eylin Uornos roli uchun “Oskar” ga sazovor bo‘ldi.
Chenning Tatum
Chenning yoshligida turli sport turlari bilan shug‘ullangan, shu sababli ko‘pchilik uni kelajakda Olimpiya chempioni bo‘ladi, deb o‘ylagan. Oradan vaqt o‘tib, u o‘qishni tashladi, stipendiyasini yo‘qotdi va Mayamiga ko‘chib o‘tdi. U yerda aktyor klubda raqqos sifatida ish boshladi. So‘ng modellik agentligi bilan shartnoma imzoladi va turli kliplarda suratga tushdi. Ko‘plab mashhurlar singari Tatum ham modellik biznesi orqali kino olamiga kirib keldi.
Mel Gibson
Gibson drama maktabida ta’lim olgan bo‘lsa ham, unda aktyorlik mahorati yetarli emas, deb hisoblardi. Mel teatr maktabida o‘qiyotgan paytda barga tashrif buyuruvchilar bilan janjallashib qoladi. Ertasi kuni ertalab u do‘stini kastingga olib boradi va rejissyor darhol yaqinda kaltaklangan yigitga e’tibor qaratadi: ko‘karishlar va jarohatlar Gibsonni jasoratli qilib ko‘rsatardi. Shundan keyin Mel “Telba Maks” filmida bosh rolni o‘ynashga taklif oladi.
Eshton Katcher
Eshton dastlab Ayova universitetida biokimyoviy muhandislik fakultetida tahsil oladi. Uning asosiy maqsadi egizak ukasining bosh miya serebral falaji va yurak klapani nuqsoniga davo topish edi. Barda ishlab yurgan kezlari uning oldiga model skaut kelib, “Ayovadagi yangi qiyofalar” tanlovida qatnashishni taklif etadi. Mazkur tanlovda g‘alaba qozongach, Eshton modellik shartnomasini imzolaydi. U Calvin Klein va Versace brendlari bilan ishlaydi. Modellik faoliyati esa Katcherga film sanoati uchun yo‘l ochadi. “70-yillar shousi” filmi unga mashhurlik olib keladi.
Denni Trexo
Denni meksikalik muhojirlar oilasida o‘sgan va jinoiy to‘dalarga qo‘shilgan. Trexo omadsiz edi — u 15 yoshidan 25 yoshigacha Kaliforniyadagi oltita qamoqxonaga tushgan. U o‘z obro‘sini oshirish uchun boks bilan shug‘ullandi, barcha qaramliklardan xalos bo‘ldi va keyinchalik spirtli ichimlik ichuvchilar klubida yordamchi bo‘ldi. O‘sha kunlarda Trexo uni butunlay kutilmagan yo‘lga olib boradigan yigit bilan uchrashdi. U “Xavfli poyezd” (“Runaway Train”) filmida sahna ortida ikkinchi darajali rolni o‘ynadi. Tez orada u o‘zining dahshatli ko‘rinishi hamda tatuirovkalari bilan boshqa rejissyorlarni jalb etdi va ko‘cha bezorilari haqidagi serialda suratga tushdi.
Izoh (0)