Сурхондарё вилояти ҳокими Улуғбек Қосимов Корея халқаро ҳамкорлик агентлиги (KOICA) лойиҳа менежери Ким Чон Бин ва лойиҳа ижрочиси, сотиб олувчи “БЖ Агро” корхонаси ижрочи директорини қабул қилди. Бу ҳақда вилоят ҳокимлиги матбуот хизмати хабар берди.
Маълум қилинишича, учрашувда Сурхондарё вилояти Олтинсой тумани ва Кореянинг Дамянг тумани ўртасида қишлоқ хўжалиги маҳсулотлари етиштириш борасида ҳамкорлик, хусусан, туманда 6 млн долларлик лойиҳани амалга оширишга инвестисия киритиш, лойиҳа доирасида 250 нафар ёшни Кореяга мавсумий ишга юбориш, брокколи карами етиштиришни йўлга қўйиш, 100 нафар олтинсойлик фермерларни Кореяда ўқитиш масалалари муҳокама қилинган.
Лойиҳани томонлар мутасаддилари иштирокида жойида кўриб, техник ва иқтисодий томонларини пухта ишлаб чиқишга келишиб олинган.
Аввалроқ камбағалликни қисқартириш ва бандлик вазири Беҳзод Мусаев Корея адлия вазири Пак Сон Же билан учрашувда ўзбекистонликлар Кореяга мавсумий ишларга юборилиши бўйича келишувга эришгани ҳақида хабар берилганди.
Изоҳ (0)