Navoiy va Surxondaryo viloyatlarida qum-shag‘al xomashyosini noqonuniy qazib olish holatlari aniqlandi, deb xabar beradi Bosh prokuratura huzuridagi departament.
Qayd etilishicha, departamentning Navoiy viloyat boshqarmasi tomonidan tergovga qadar tekshiruv o‘tkazilgan. Tekshiruvda “N.T.” korxonasi masʼul shaxslari Nurota tumani hududida joylashgan “Ko‘chat” qum-shag‘al aralashmasi koni atrofidagi yer maydonlaridan maxsus texnikalar yordamida o‘zboshimchalik bilan 17,9 ming kub hajmdagi qum-shag‘al xomashyosini qazib olib, davlat va jamiyat manfaatlariga 232,9 million so‘m zarar yetkazgani aniqlangan.
Shu kabi, departamentning Sariosiyo tuman bo‘limi tomonidan o‘tkazilgan tergovga qadar tekshiruvda “M.M.” korxonasi masʼul shaxslari tumandagi muhofaza zonasiga kiruvchi yer maydonidan 5,5 ming kub hajmdagi qum-shag‘al xomashyosini qazib olib, davlat va jamiyat manfaatlariga 143,4 million so‘m zarar yetkazgani ma’lum bo‘lgan.
Mazkur holatlar yuzasidan Jinoyat kodeksining 229-moddasi (o‘zboshimchalik) moddasi bilan jinoyat ishlari qo‘zg‘atilib, tergov harakatlari o‘tkazilmoqda.
Ma’lumot uchun, prezident farmoni bilan Chirchiq, Sangzor, Zarafshon, Norin, Qashqadaryo, Surxondaryo va Sirdaryo daryolari o‘zanlaridagi noruda materiallarni qazib olishga 2024-yil 1-maydan muddatsiz moratoriy joriy qilinadi. Noqonuniy qazib olish ishlari natijasida tabiatga yetkazilgan zarar uchun javobgarlik ham kuchaytiriladi.
Izoh (0)