Навоий ва Сурхондарё вилоятларида қум-шағал хом ашёсини ноқонуний қазиб олиш ҳолатлари аниқланди, деб хабар беради Бош прокуратура ҳузуридаги департамент.
Қайд этилишича, департаментнинг Навоий вилоят бошқармаси томонидан терговга қадар текширув ўтказилган. Текширувда “Н.Т.” корхонаси масъул шахслари Нурота тумани ҳудудида жойлашган “Кўчат” қум-шағал аралашмаси кони атрофидаги ер майдонларидан махсус техникалар ёрдамида ўзбошимчалик билан 17,9 минг куб ҳажмдаги қум-шағал хом ашёсини қазиб олиб, давлат ва жамият манфаатларига 232,9 миллион сўм зарар етказгани аниқланган.
Шу каби, департаментнинг Сариосиё туман бўлими томонидан ўтказилган терговга қадар текширувда “М.М.” корхонаси масъул шахслари тумандаги муҳофаза зонасига кирувчи ер майдонидан 5,5 минг куб ҳажмдаги қум-шағал хом ашёсини қазиб олиб, давлат ва жамият манфаатларига 143,4 миллион сўм зарар етказгани маълум бўлган.
Мазкур ҳолатлар юзасидан Жиноят кодексининг 229-моддаси (ўзбошимчалик) моддаси билан жиноят ишлари қўзғатилиб, тергов ҳаракатлари ўтказилмоқда.
Маълумот учун, президент фармони билан Чирчиқ, Сангзор, Зарафшон, Норин, Қашқадарё, Сурхондарё ва Сирдарё дарёлари ўзанларидаги норуда материалларни қазиб олишга 2024 йил 1 майдан муддатсиз мораторий жорий қилинади. Ноқонуний қазиб олиш ишлари натижасида табиатга етказилган зарар учун жавобгарлик ҳам кучайтирилади.
Изоҳ (0)