O‘zbek telekanallarida har shanba Milliy kino kuni bo‘ladi. Bu haqda Kinematografiya agentligi axborot xizmati xabar berdi.
Maʼlum qiliniishcha, “Renessans” kino uyida prezident tashabbusi bilan “Biz bir bo‘lsak – yagona xalqmiz, birlashsak – vatanmiz” shiori ostida Respublikadagi telekanallarda haftaning bir kunini Milliy kino kuni sifatida belgilash hamda milliy filmlar namoyishini yo‘lga qo‘yish maqsadida anjuman bo‘lib o‘tdi.
Anjuman davomida milliy manfaatlarni himoya qilish, milliy madaniyat va qadriyatlarni asrash, kelgusi avlodlarga bus-butun yetkazish, yoshlarni yuksak vatanparvarlik ruhida tarbiyalash maqsadida davlat buyurtmasiga asosan yaratilgan milliy filmlar namoyishini tashkil etish bo‘yicha hamkorlik memorandumi imzolandi.
Unga ko‘ra, haftaning har shanba kuni Milliy kino kuni etib belgilandi. Bu kunda davlat va nodavlat telekanallarda faqat milliy filmlar namoyish qilinadi.
“Bu aksiyamiz xalqimizga manzur bo‘ladi. Chunki biz aksiya orqali, avvalo yangi filmlarimiz bilan birga, retro filmlarimizni ham xalqimizga taqdim etamiz. Tomoshabinlarimiz bu filmlarni sog‘inishgan, albatta. Bular xorijiy kinofondlardan qaytarilgan o‘zbek filmlarining etalon nusxalaridir. Yana shunga aminmizki, prezidentimizning bu tashabbusi bilan tomoshabinlarda o‘zbek filmlariga nisbatan qiziqish yanada ortadi”, – degan Kinematografiya agentligi direktori.
Izoh (0)