Toshkent viloyati Bekobod shahrida joylashgan “O‘zmetkombinat” AJ ishchisi o‘zini osib qo‘ydi. Bu haqda Bosh prokuratura matbuot kotibi “Daryo”ga ma’lum qildi.
Qayd etilishicha, 17-aprel kuni soat 09:00 larda shahar IIB navbatchilik qismiga kelib tushgan xabarga ko‘ra, 53 yoshli K.SH. o‘z ish joyi yaʼni, “O‘zmetkombinat” AJga qarashli “Navli prokat bo‘limi”ning omborxonasida o‘zini osib, joniga qasd qilgan.
Marhumning o‘lim sababini aniqlash yuzasidan sud-tibbiy ekspertizasi tayinlangan bo‘lib, ekspertizaning dastlabki maʼlumotnomasiga ko‘ra, K.SH.ning o‘limiga bo‘yin aʼzolari sirtmoq bilan qisilishi natijasida yuzaga kelgan mexanik asfiksiya sabab bo‘lganligi ko‘rsatilgan.
Shuningdek, shahar ko‘p tarmoqli poliklinikasining maʼlumotnomalariga asosan marhum psixiatr va narkolog ro‘yxatida turmasligi aniqlangan. Hodisa joyidan ashyoviy dalil sifatida marhum o‘zini osishda foydalangan 1,5 metr bo‘lgan arqon olingan.
Hozirda mazkur holat yuzasidan shahar prokuraturasi tomonidan tergovga qadar tekshirish harakatlari olib borilmoqda.
Aprel boshlarida Namangan viloyatining Yangiqo‘rg‘on tumanida 43 yoshli erkak shifoxonada o‘zini osib qo‘ygani to‘g‘risida xabar berilgandi. Aniqlanishicha, shu kuni marhum turmush o‘rtog‘ining chaqiruviga asosan tuman IIB profilaktika inspektori tomonidan ko‘p miqdorda spirtli ichimlik iste’mol qilib, ko‘p qavatli uy atrofida mast yotganligi sababli hushyorlantirish maqsadida markaziy shifoxonadagi hushyorxonaga olib borilib, u yerga yotqizilgan.
Izoh (0)