Tojikistonda folbinlik va jodugarlik bilan shug‘ullanuvchilarga qarshi kurash doirasida ular uchun majburiy mehnat joriy etish to‘g‘risida qaror qabul qilindi. Bu haqda Tojikiston Ichki ishlar vazirligi xabar berdi.
Maʼmuriy qonun hujjatlariga kiritilishi rejalashtirilgan o‘zgartirishlarga ko‘ra, sehrgarlar, folbinlar, shuningdek, qonunga xilof ravishda diniy taʼlimot olib borayotgan shaxslar 6 oygacha bo‘lgan muddatga majburiy mehnatga tortilishi mumkin.
Ushbu chora-tadbirlar okkultizm sohasidagi jinoiy harakatlarga qarshi yanada samaraliroq kurashish va mamlakatda jamoat tartibini saqlashga qaratilgan, — deyiladi vazirlik xabarida.
Politsiya ma’lumotlariga ko‘ra, mamlakatda bu kabi odatlarning keng tarqalishi sabablardan biri ayrim fuqarolarning islom shariati tavsiyalari va huquqiy me’yorlarga e’tibor bermayotganidir.
Ayni paytda mamlakat qonunchiligida jodugarlik va folbinlik bilan shug‘ullanganlik uchun jazo (ma’muriy huquqbuzarlik to‘g‘risidagi kodeksining 482-moddasi) hisob ko‘rsatkichining 40 dan 50 barobarigacha (1 barobar 70 somoniy – 71 ming so‘m) jarima nazarda tutilgan. Qoidabuzarliklar takrorlangan taqdirda jarima miqdori hisob ko‘rsatkichining 60-100 baravarigacha oshirilishi mumkin.
Izoh (0)