Pokiston hukumatining Afg‘onistonda joylashgan muxolif guruhlari Islomobodning iqtisodiy manfaatlarini nishonga olmoqda. Bu haqda Pokiston harbiy qo‘mondonlari 16-aprel, seshanba kuni mamlakat armiyasi rahbari general Sayid Asim Munir raisligida o‘tgan yig‘ilishda aytib o‘tdi.
Pokiston armiyasi bayonotida ushbu uchrashuv “Tolibon” hukmronligi ostidagi Afg‘oniston hududidan “terrorchi guruhlar”ning ehtimoliy tahdidlarini bartaraf etish maqsadida o‘tkazilgani ma’lum qilingan.
Pokiston harbiy rasmiylari aniq bir guruh nomini aytmay, Afg‘onistonda joylashgan jangarilar mintaqa va dunyo xavfsizligiga tahdid solayotganini aytdi.
Pakistan Today xabariga ko‘ra, qo‘mondonlar yaqinda Xaybar-Paxtunxva viloyatida xitoylik muhandislarni olib ketayotgan mashinaga jangarilar tomonidan uyushtirilgan hujum va Pokistonning Balujiston viloyatida tinch aholini olib ketayotgan mashinaga qilingan hujumni qoralab, jangarilar bu davlatning iqtisodiy manfaatlarini, xususan, Xitoy va Pokistonning iqtisodiy koridorini nishonga olganini aytgan.
Avvalroq ham Pokiston hukumati Afg‘onistondagi muxolif jangarilarining faoliyatidan xavotir bildirgan edi.
“Tolibon” hozircha bu bayonotlarga munosabat bildirmagan, biroq bungacha bu harakat rasmiylari Afg‘onistonda Pokiston hukumatiga qarshi jangarilar borligini inkor etib, Afg‘oniston tuprog‘i hech qaysi davlatga qarshi ishlatilmasligini aytgan.
Izoh (0)