Қорақалпоғистон Республикаси ва Қашқадарё вилоятида тегишли ҳужжатлари бўлмаган ҳамда кучли таъсир қилувчи дори воситалари муомалага киритилишининг олди олинди. Бу ҳақда Бош прокуратура ҳузуридаги департамент хабар берди.
Қайд этилишича, департамен ҳамда Божхона қўмитасининг Қашқадарё вилояти бошқармалари томонидан Фармацевтика маҳсулотлари хавфсизлиги маркази ходимлари билан ҳамкорликда тезкор тадбир ўтказилган. Тадбирда “Ф.М.” хусусий корхонасига ва ушбу корхонага қарашли дорихонада тегишли ҳужжатлари бўлмаган умумий баҳоси 307,8 миллион сўмлик 218 турдаги дори воситалари мавжудлиги аниқланиб, ушбу дори воситалари ашёвий далил сифатида олинган.
Департаментнинг Қорақалпоғистон Республикаси бошқармаси томонидан Қўнғирот туманида ўтказилган тезкор тадбирда фуқаро Г.М. фуқаро Д.Б.га жами 720 та капсуладаги “Фатзорб Плус” ва “Фатзорб ТМ Плус” номли кучли таъсир қилувчи дори воситаларини 4,6 миллион сўмга сотгани аниқланиб, ушбу дори воситалари ашёвий далил сифатида олинган.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Март охирларида “Ғишткўприк” постида 900 миллион сўмлик дори воситаларини Ўзбекистонга олиб ўтмоқчи бўлган шахс тўхтатиб қолингани тўғрисида хабар берилганди.
Изоҳ (0)