Farg‘ona viloyati hokimi Xayrullo Bozorov Xitoyning Crown ceramic kompaniyasi direktori Syan Chen Ganni qabul qildi. Bu haqda viloyat hokimligi matbuot xizmati xabar berdi.
Maʼlum qilinishicha, uchrashuvda Xitoy kompaniyasining to‘g‘ridan to‘g‘ri 40 mln dollar investitsiyasi hisobiga Quvasoy shahrida barpo etishga kirishilgan premium sifatdagi keramogranit plitalari ishlab chiqarish zavodi loyihasini amalga oshirish bilan bog‘liq masalalar muhokama qilindi.
2024-yil mart oyi boshida qurilish ishlari boshlangan ushbu zavod, yillik 10 mln kv/metr yuqori sifatdagi va katta o‘lchamlardagi keramogranit plitalari ishlab chiqarish quvvatiga ega bo‘ladi. Ishlab chiqariladigan mahsulotlar ichki bozor bilan birga MDH davlatlari hamda Sharqiy Yevropa mamlakatlariga eksportga yo‘naltiriladi. 2024-yil yakunida ishga tushirilishi rejalashtirilayotgan ushbu yirik zavodda 500 ga yaqin doimiy ish o‘rni yaratiladi.
Viloyat hokimi Syan Chen Ganga Crown ceramic MCHJ xorijiy korxonasining viloyatda davlat ro‘yxatidan o‘tkazilgani to‘g‘risidagi guvohnomani topshirdi.
Xitoyning yana bir yirik kompaniyasi — Jianhua Ceramics tomonidan “Qo‘qon” EIZ hududida keramika mahsulotlari va kafel ishlab chiqarish bo‘yicha yirik investitsion loyiha ham amalga oshirilmoqda. Ushbu loyihaga xitoylik investorlarning 50 mln dollar to‘g‘ridan to‘g‘ri investitsiyasi yo‘naltirilgan.
Izoh (0)