Farg‘ona viloyati hokimi Xayrullo Bozorov Xitoyning Chendu shahri Sanoat va savdo federatsiyasi raisining o‘rinbosari Deng Bo boshchiligidagi delegatsiyani qabul qildi. Bu haqda viloyat hokimligi matbuot xizmati xabar berdi.
Uchrashuvda xitoylik ishbilarmonlar tomonidan sanoat, mashinasozlik, qishloq xo‘jaligi va turizm sohasi bo‘yicha Farg‘onada kelgusida amalga oshirilishi rejalashtirilayotgan yangi loyihalar bo‘yicha fikr almashilgan.
Deng Bo, bu galgi tashrif davomida Farg‘onada yirik Xitoy sanoat parki tashkil etish, uning tarkibida avtomobilsozlik, Xitoy sanoat kompaniyalarining, shu jumladan, avtomobilsozlik korxonalarining ishlab chiqarishlarini yo‘lga qo‘yish, qishloq xo‘jaligi yo‘nalishida viloyatda yetishtirilgan qishloq xo‘jaligi mahsulotlarini Xitoyga eksport qilish, farg‘onalik tadbirkorlarga Xitoyda o‘z bozorini topishga ko‘maklashish, turizm sohasi bo‘yicha o‘zaro manfaatli hamkorlikni rivojlantirish masalalarini ko‘rib chiqish maqsad qilinganini qayd etgan.
Viloyat hokimi har bir bildirilgan taklif Farg‘ona iqtisodiyoti uchun ahamiyatli ekanini taʼkidlab, ularni qo‘llab-quvvatlashga, barcha yo‘nalishlar bo‘yicha hamkorlikda ishlashga tayyor ekanligini bildirgan.
Uchrashuvda muhokama qilingan hamda hamkorlik qilish bo‘yicha kelishib olingan barcha masalalar yuzasidan ikki hudud qo‘shma “Yo‘l xaritasi”ni tayyorlash hamda uning asosida hamkorlikni kengaytirib borishga kelishib olingan.
Uchrashuvda Farg‘onada Chendu savdo uyi ochilgani ham maʼlum qilinib, Deng Boga uning ro‘yxatdan o‘tkazilgani haqidagi guvohnoma topshirilgan.
Izoh (0)