Ijtimoiy tarmoqlarda “Nurobod MMTB mudiri haqorat qilgan ma’naviyatchi kasalxonaga tushdi” mazmunida xabarlar tarqaldi. Viloyat Maktabgacha va maktab ta’limi boshqarmasi mazkur xabar haqiqatga to‘g‘ri kelmasligini ma’lum qildi.
Maktabgacha va maktab ta’limi bo‘limi ishchi guruhi tomonidan holat o‘rganilganda, 2024-yil 2-aprel kuni soat 14:00 da tumandagi barcha umumiy o‘rta ta’lim maktablari direktorlari ishtirokida o‘tkazilgan yig‘ilishda ishtirok etgan tuman markaziga yaqin maktablar direktorlari hamda bo‘lim xodimlari yaqinda tuman maktabgacha va maktab ta’limi bo‘limi mudiri vazifasini vaqtincha bajaruvchi lavozimiga tayinlangan L.K. 43-umumta’lim maktabining ma’naviyat ishlari bo‘yicha direktor o‘rinbosarini hech qanday haqorat qilmaganini o‘z tushuntirishlarida bayon qilgan.
Mazkur yig‘ilishda 5 ta masala ko‘rilgan, yig‘ilishda kun tartibiga qo‘yilgan masalalar muhokama qilib bo‘lingandan so‘ng, yig‘ilish yakunida soat 15:30 lar atrofida 43-maktabning direktori va o‘rinbosarlari kechikib kelgan.
Bo‘lim boshlig‘i v.v.b. L.K. joriy yilning 30-mart kuni Nurobod tumanidagi maktablar faoliyati bilan tanishish maqsadida olis hududda joylashgan 43-umumta’lim maktabida bo‘lganida soat 10:40 bo‘lishiga qaramasdan maktab direktori SH.Q. o‘z joyida emasligi, shuningdek, sinfxonalardagi “sinf oyna”larining bo‘sh turgani, shkaflarning eshiklari sinib yotgani, eshik tutqichlarining yo‘qligi, devorlarda o‘quvchilar tomonidan yozilgan harflarga maktabdagi mas’ullarning e’tiborsizligi va mas’uliyatsizligi, shuningdek, davomat masalasi tanqid qilingan.
Yuqorida ko‘rsatilgan kamchiliklar yuzasidan 43-maktab direktori va rahbarlariga kamchiliklarni bartaraf etish yuzasidan topshiriqlar berilayotgan vaqtda 43-maktab direktorining ma’naviy-ma’rifiy ishlar bo‘yicha direktor o‘rinbosari M.E. hushini yo‘qotgan. Bemorni tuman tez tibbiy yordam bo‘limi olib ketgan.
Tekshiruv xulosasida bemorning qon bosimi oshgani qayd etilgan. Bo‘limning maktablar faoliyatini muvofiqlashtirish sho‘basi mudiri T.X.ning ta’kidlashicha, soat 19:30 larda tuman tibbiyot birlashmasiga borib M.E.ning holidan xabar olganida, uning holati yaxshi ekani, uyiga javob berilgani va sog‘lig‘i joyida ekani bildirilgan.
Izoh (0)