Navoiy viloyati adliya boshqarmasi tomonidan o‘tkazilgan “Hech bir shaxs hujjatsiz qolmaydi” aksiyasi doirasida 94 yoshli Anora Musurmonovaga tug‘ilganlik haqidagi guvohnoma topshirildi.
Maʼlum bo‘lishicha, Anora Musurmonova 1930-yilning 1-iyulda Nurota tumanida tug‘ilgan. U 94 yil davomida tug‘ilganlik guvohnomasiga ega bo‘lmagan.
Aksiya doirasida amalga oshirilgan ishlarga doir onlayn suhbatda Adliya vazirligi bo‘lim boshlig‘i Hasan Nasimov Anora Musurmonova haqidagi ayrim maʼlumotlarni aytdi.
“Hamkasblarimiz bilan suhbatda Anora momo oilada 9 farzand bo‘lganlari, ikki akasi urushdan qaytmagani, keyin ro‘zg‘orning tashvishi yetti qizga tushganini aytgan. O‘zlari guvohnoma olishga harakat qilgan ekan. Lekin yoshliklarida akalari yo‘qligi va boshqa sabablar bilan hujjat olishning imkoni bo‘lmagan. Anora Musurmonova 1949-yilda Yuzboy Nurboyev bilan turmush qurib, o‘n nafar farzandni dunyoga keltirgan. Bugungi kunda momoning 80 dan ortiq nevara, chevara va evaralari bor. Momo shu paytgacha bitta dalolatnoma asosida nafaqa olib kelgan. Tug‘ilganlik haqidagi guvohnoma rasmiylashtirib berishimizni umuman kutmagan ekan. Anora momoga ID karta olish masalasi ham kelasi hafta hal bo‘ladi. Momo hamkasblarimiz bilan suhbatda ‘endi men O‘zbekistonning haqiqiy fuqarosiman‘, deb ko‘zda yosh bilan duolar qilgan” — dedi vazirlik vakili.
Onlayn suhbatda Adliya idoralari o‘tkazgan “Hech bir shaxs hujjatsiz qolmaydi” aksiyasi doirasida jami 116 ming 415 nafar fuqaroning hujjat bilan bog‘liq muammolari hal qilingani aytildi. Shundan 1639 nafar shaxslarning tug‘ilishi bugungi kungacha qayd etilmagan bo‘lgan. Aksiya davomida ularning tug‘ilishi qayd etilib, guvohnomasiga asosan shaxsini tasdiqlovchi ID kartalar topshirilgan.
Izoh (0)