Навоий вилояти адлия бошқармаси томонидан ўтказилган “Ҳеч бир шахс ҳужжатсиз қолмайди” акцияси доирасида 94 ёшли Анора Мусурмоновага туғилганлик ҳақидаги гувоҳнома топширилди.
Маълум бўлишича, Анора Мусурмонова 1930 йилнинг 1 июлда Нурота туманида туғилган. У 94 йил давомида туғилганлик гувоҳномасига эга бўлмаган.
Акция доирасида амалга оширилган ишларга доир онлайн суҳбатда Адлия вазирлиги бўлим бошлиғи Ҳасан Насимов Анора Мусурмонова ҳақидаги айрим маълумотларни айтди.
“Ҳамкасбларимиз билан суҳбатда Анора момо оилада 9 фарзанд бўлганлари, икки акаси урушдан қайтмагани, кейин рўзғорнинг ташвиши етти қизга тушганини айтган. Ўзлари гувоҳнома олишга ҳаракат қилган экан. Лекин ёшликларида акалари йўқлиги ва бошқа сабаблар билан ҳужжат олишнинг имкони бўлмаган. Анора Мусурмонова 1949 йилда Юзбой Нурбоев билан турмуш қуриб, ўн нафар фарзандни дунёга келтирган. Бугунги кунда момонинг 80 дан ортиқ невара, чевара ва эваралари бор. Момо шу пайтгача битта далолатнома асосида нафақа олиб келган. Туғилганлик ҳақидаги гувоҳнома расмийлаштириб беришимизни умуман кутмаган экан. Анора момога ID карта олиш масаласи ҳам келаси ҳафта ҳал бўлади. Момо ҳамкасбларимиз билан суҳбатда ъэнди мен Ўзбекистоннинг ҳақиқий фуқаросиманъ, деб кўзда ёш билан дуолар қилган” — деди вазирлик вакили.
Онлайн суҳбатда Адлия идоралари ўтказган “Ҳеч бир шахс ҳужжатсиз қолмайди” акцияси доирасида жами 116 минг 415 нафар фуқаронинг ҳужжат билан боғлиқ муаммолари ҳал қилингани айтилди. Шундан 1639 нафар шахсларнинг туғилиши бугунги кунгача қайд этилмаган бўлган. Акция давомида уларнинг туғилиши қайд этилиб, гувоҳномасига асосан шахсини тасдиқловчи ID карталар топширилган.
Изоҳ (0)