72 yoshli shved aktyori, “Oltin globus” mukofoti laureati Stellan Skarsgard “Dyuna” filmidagi baron Vladimir Xarkonnen roli uchun 8 soat vaqt davomida grim qilingan. Bu haqda “Pravila jizni” nashri ma’lum qildi.
“Bu juda azobli, lekin arziydigan ish edi”, — deydi Skarsgard. “Biz uning xarakterini qahramon ekranda paydo bo‘lishi bilan tomoshabinlarga tashqi ko‘rinishi orqali ifoda etishni istadik. Ilk taassurot butun film davomida saqlanib qolishi kerak edi”, — deya qo‘shimcha qildi aktyor.
Stellann faoliyati davomida bunday murakkab grimga birinchi marta duch kelmadi. U “Karib dengizi qaroqchilari” filmida irlandiyalik dengizchi Bill Tyorner rolini o‘ynagan. Filmda qahramon noma’lum sabablarga ko‘ra qaroqchiga aylanadi. Uning ta’sirli tashqi ko‘rinishi uchun 6 soatli grim mehnati ketgan.
“Suratga olish maydonida haqiqiy protezli aktyor faqat men edim. Qolgan barcha aktyorlar filmni suratga olish boshlanishidan besh daqiqa avval kemada paydo bo‘ldi, ularga 5 daqiqalik pardoz qilishar edi, xolos. Men 6 soat davomida grimchilar kursisida o‘tirdim”, — deya so‘zida davom etdi aktyor va u doim vizajistlar ishini tomosha qilishdan zavqlanishini ta’kidladi.
“Dyuna” filmining ikkinchi qism 1-mart kuni ilk bor AQSHda namoyish etilgan va uch kun ichida 81,5 million dollar to‘plagan. Mazkur sikvel birinchi qismining daromadini deyarli ikki baravar oshirdi. 2021-yilda filmning 1-qismi taqdimotida 41 million dollar foyda ko‘rgan edi.
Izoh (0)