Қўшма Штатлар ва Жанубий Корея шу ҳафтада Шимолий Кореяни ноқонуний нефть сотиб олишни тўхтатишга қаратилган янги ишчи гуруҳини жорий қилди. Бу ҳақда Reuters хабар берди.
Вашингтонда 26 март куни ишчи гуруҳ биринчи йиғилишини ўтказган.
Учрашувда вазирлик ва идораларнинг дипломатия, разведка, санкциялар ва денгиз тақиқлари учун масъул бўлган 30 дан ортиқ расмий вакиллари иштирок этди, — дейилади Жанубий Корея ТИВ баёнотида.
Ҳар икки томон Россиянинг Шимолий Кореяга нефть етказиб бериш эҳтимолидан хавотир билдириб, Москва ва Пхеньян ўртасидаги ноқонуний ҳамкорликни тўхтатиш йўлларини муҳокама қилган.
БМТ Хавфсизлик Кенгаши Шимолий Кореянинг ядро қуроллари ва ракета дастурларига қўйган чекловларига кўра, Пхеньян йилига 4 миллион баррель хом нефть ва 500 минг баррель қайта ишланган маҳсулотлар импорти билан чекланади.
БМТ дипломати Россия БМТнинг Шимолий Кореяга қарши санкцияларни назорат қилувчи резолюцияга вето қўйиши эҳтимоли катталигини айтган.
БМТнинг санкцияларни назорат қилувчи гуруҳи шу ойда Шимолий Корея байроғи остидаги танкерлар ўтган йилнинг 1 январидан 15 сентябргача 1,5 миллион баррелдан ортиқ нефть маҳсулотларини етказиб берганини маълум қилган. Сунъий йўлдошдан олинган тасвирлар Шимолий Кореянинг нефть танкерлари, жумладан, санкцияланган баъзи кемалар сўнгги ҳафталарда Россия портларига ташриф буюрганини кўрсатган.
АҚШ—Жанубий Корея ишчи гуруҳи Шимолий Кореянинг санкциялардан бўйин товлаш фаолиятини фош қилиш, бир томонлама санкциялар қўллаш ва минтақадаги хусусий сектор ва учинчи томонларни қасддан ёки билмасдан нефть етказиб беришга ёрдам беришини кўриб чиқмоқда.
Келгусида ишчи гуруҳ санкциялардан қочишнинг бошқа соҳаларини, жумладан, кўмир сотишни ҳам кўриб чиқиши мумкин, — дейилади департамент баёнотида.
Изоҳ (0)