Фарғона вилояти ҳокими Хайрулло Бозоров Хитойнинг Ченду шаҳри Саноат ва савдо федерацияси раисининг ўринбосари Денг Бо бошчилигидаги делегацияни қабул қилди. Бу ҳақда вилоят ҳокимлиги матбуот хизмати хабар берди.
Учрашувда хитойлик ишбилармонлар томонидан саноат, машинасозлик, қишлоқ хўжалиги ва туризм соҳаси бўйича Фарғонада келгусида амалга оширилиши режалаштирилаётган янги лойиҳалар бўйича фикр алмашилган.
Денг Бо, бу галги ташриф давомида Фарғонада йирик Хитой саноат парки ташкил этиш, унинг таркибида автомобилсозлик, Хитой саноат компанияларининг, шу жумладан, автомобилсозлик корхоналарининг ишлаб чиқаришларини йўлга қўйиш, қишлоқ хўжалиги йўналишида вилоятда етиштирилган қишлоқ хўжалиги маҳсулотларини Хитойга экспорт қилиш, фарғоналик тадбиркорларга Хитойда ўз бозорини топишга кўмаклашиш, туризм соҳаси бўйича ўзаро манфаатли ҳамкорликни ривожлантириш масалаларини кўриб чиқиш мақсад қилинганини қайд этган.
Вилоят ҳокими ҳар бир билдирилган таклиф Фарғона иқтисодиёти учун аҳамиятли эканини таъкидлаб, уларни қўллаб-қувватлашга, барча йўналишлар бўйича ҳамкорликда ишлашга тайёр эканлигини билдирган.
Учрашувда муҳокама қилинган ҳамда ҳамкорлик қилиш бўйича келишиб олинган барча масалалар юзасидан икки ҳудуд қўшма “Йўл харитаси”ни тайёрлаш ҳамда унинг асосида ҳамкорликни кенгайтириб боришга келишиб олинган.
Учрашувда Фарғонада Ченду савдо уйи очилгани ҳам маълум қилиниб, Денг Бога унинг рўйхатдан ўтказилгани ҳақидаги гувоҳнома топширилган.
Изоҳ (0)