Farg‘ona shahridagi ikki qavatli uyda gaz portlashi oqibatida uch nafar hindistonlik fuqaro jarohatlandi.
Bosh prokuratura matbuot xizmati rahbari Hayot Shamsutdinovning “Daryo”ga ma’lum qilishicha, voqea 11-mart kuni Sharq ko‘chasida joylashgan uyda yuz bergan.
Oqibatda ushbu uyda ijarada yashagan uch nafar Hindiston fuqarosi turli xil termik kuyish jarohatlarini olgan. Fuqarolarning ikki nafari 23, yana biri 21 yoshda bo‘lib, ular Farg‘ona jamoat salomatligi tibbiyot instituti talabalari bo‘lgan.
Hozirda ularga shifoxonada tibbiy yordam ko‘rsatilmoqda. Holat yuzasidan Jinoyat kodeksining 259-moddasi (yong‘in xavfsizligi qoidalarini buzish) bilan jinoyat ishi qo‘zg‘atilgan.
Izoh (0)